पोखरा रंगशालामा रोड रेसिङ च्याम्पियनसिपको आज क्वालिफाइङ राउन्ड चल्दै

काठमाडौं – आज र भोलि शनिबार पोखरा रंगशालामा नेपाल रोड रेसिङ च्याम्पियनसिप हुने भएको छ । मोटर स्पोर्ट्स नेपाल र पोखरा महानगर खेलकुद विकास समितिको आयोजनामा उक्त च्याम्पियनसिप हुने भएको हो ।

नोभिस र नेसनल गरी दुई क्याटागोरीमा बाइक राइडहरुका बीचमा हुने सो प्रतियोगिताको शुक्रबार क्लालिफाइङ राउन्ड र शनिबार फाइनल प्रतियोगिता हुनेछ । मोटर स्पोर्ट्स नेपालका अध्यक्ष विनोद तण्डुकारका अनुसार नोभिसमा ४८ र नेसनलमा १८ राइडर सहभागी हुने छन् ।

प्रतियोगितामा विजेता खेलाडीलाई नगदका साथै शिल्ड र प्रमाणपत्र प्रदान गरिने छ । देशभरका राइडर सहभागी हुने सो प्रतियोगिताको मुख्य प्रायोजक यामाहा आर१५ सिरिज रहेको छ ।

सो प्रतियोगितालाई अन्य विभिन्न संस्था र कम्पनीहरुको समेत सहयोग रहेको छ । मोटर स्पोर्ट्स नेपालले नियमित रुपमा गर्दै आएको यस प्रकारको प्रतियोगिताको यो अर्को संस्करण हो ।

क्वालिफाइङ राउन्डमा छनोट भएका राइडरका बीचमा भालि हुने फाइनल प्रतियोगिता पश्चात विजयी घोषणा गरिने छ ।

सो इभेन्टलाई मोटरसाइकलको अन्तर्राष्ट्रिय महासंघ एफआईएम तथा नासा नेपालको समेत सहयोग रहेको छ । विजेताहरुलाई अन्तर्राष्ट्रिय प्रतियोगिताहरुमा सहभागिताको अवसर प्रदान गरिने बताइएको छ ।