कारमा ब्रेक लगाउन दायाँ वा बायाँ कुन खुट्टा प्रयोग गर्ने ?

सुरुमा कार ड्राइभिङ गर्दा कारको फिचर कहिले वा कसरी प्रयोग गर्ने भन्ने बारेमा दोधारमा परिन्छ । कहिलेकाहीँ यस्ता साना कुराले पनि ठूलो समस्या निम्त्याउन सक्छ । विशेषगरी कारको ब्रेक दबाउँदा कुन खुट्टा उपयोग गर्ने भन्ने बारेमा जानकारी हुनु आवश्यक छ ।

अटोमेटिक र म्यानुअल कारमा ब्रेक थिच्ने एउटै तरिका हुन्छ । तर ब्रेक थिच्दा गलत खुट्टाको प्रयोगले समस्या पार्न सक्छ । जसका कारण दुर्घटना पनि हुन सक्छ ।

म्यानुअल कार
कार चलाउँदा चालकको बायाँ खुट्टा पूर्ण रूपमा क्लचमा हुनुपर्छ । बायाँ खुट्टाले ब्रेक कहिल्यै थिच्नु हुँदैन । क्लचमा स्प्रिङ एक्सन हुन्छ र बायाँ खुट्टाले क्लचलाई दबाएर थिच्ने बानी परेको हुन्छ । तर ब्रेक बिस्तारै थिचिन्छ । एक्सिलरेटर र ब्रेक सँगै हुने र यसलाई हल्का मात्र थिचे पुग्ने भएकाले यसका लागि दायाँ खुट्टाको प्रयोग गर्नुपर्छ । दायाँ खुट्टा एक्सिलरेटरबाट हटाइयो भने गति कम हुन्छ र ब्रेक थिच्दा क्लचको साथ गियर परिवर्तन गरेर पनि कार रोक्न सकिन्छ ।

अटोमेटिक कार
अटोमेटिक कारमा क्लच प्याडल नहुने भएकाले बायाँ खुट्टा फ्रि राख्नुपर्छ । अटोमेटिक कारमा चारै टायरमा डिस्क ब्रेक हुन्छ र बायाँ खुट्टाले ब्रेक थिच्दा प्रेशरमा ब्रेक लाग्न सक्छ । यस्तो अवस्थामा दुर्घटना पनि हुन सक्छ ।

अटोमेटिक कार चलाउँदा यस्ता समस्याबाट बच्नका लागि बायाँ खुट्टा अलिकति पछाडि नै राख्नुपर्छ । यस्तो गरेमा ब्रेक थिच्दा दायाँ खुट्टा अटोमेटिक रूपमा प्रयोग हुनेछ ।