रेनोको नयाँ कम्प्याक्ट एसयूभी ‘ब्रिजर’ कन्सेप्ट, सन् २०२७ मा उत्पादन सुरु हुने

रेनोले आफ्नो नयाँ कम्प्याक्ट एसयूभी ‘ब्रिजर’ को कन्सेप्ट मोडल पेश गरेको छ । सो नयाँ मोडल कम्पनीको पोर्टफोलियोमा थपिने कम्प्याक्ट एसयूभी हुनेछ, जसलाई भविष्यमा डस्टरभन्दा तलको स्थानमा राख्न सकिने सम्भावना रहेको बताइएको छ।

रेनोले ब्रिजर कन्सेप्टलाई अन्तर्राष्ट्रिय बजारलाई लक्षित गरेर डिजाइन गरेको भए पनि भारत यसको प्रमुख बजारमध्ये एक हुने बताइएको छ। कम्पनीले यस एसयूभीको उत्पादन भारतमै गर्ने पुष्टि गरेको छ। कम्पनीका अनुसार यसको उत्पादन सन् २०२७ मा सुरु हुने अपेक्षा गरिएको छ र सोही वर्ष बजारमा उपलब्ध गराइने सम्भावना छ।

रेनो ब्रिजर सानो आकारको भए पनि यसको बाहिरी बनावट बलियो र आकर्षक बनाइएको छ। यसको फ्रन्टमा स्पष्ट बडी लाइनहरू र ग्रिलसम्म फैलिएका फराकिला लाइटिङ एलिमेन्ट देख्न सकिन्छ। साथै, चौडा ह्विल आर्च, उच्च ग्राउन्ड क्लियरेन्स र पछाडिको ढोकामा जडान गरिएको स्पेयर टायरले यसलाई परम्परागत एसयूभी जस्तो मजबुत उपस्थिति दिएको छ।

यसमा २०० एमएमको ग्राउन्ड क्लियरेन्स रहेको छ । साथै यसमा १८ इन्चका पाङ्ग्राहरू प्रयोग गरिएको छ ।गाडीको डिजाइनमा शार्प र सफा बडी लाइन प्रयोग गरिएको छ । कम्प्याक्ट आकारको भए पनि गाडीको भित्री स्थान पर्याप्त हुने कम्पनीको दाबी छ। विशेषगरी पछाडिका यात्रुहरूका लागि करिब २०० एमएम नी स्पेस उपलब्ध हुने बताइएको छ, जुन यस वर्गका एसयूभीका लागि राम्रो मानिन्छ। यसबाहेक, गाडीमा करिब ४०० लिटर क्षमताको बुट स्पेस पनि उपलब्ध हुनेछ ।

सो नयाँ मोडल रेनोको आरजीएमपी सानो मोड्युलर प्लेटफर्ममा निर्माण गरिनेछ। यही प्लेटफर्ममा नयाँ रेनो डस्टर पनि आधारित हुने बताइएको छ । सो प्लेटफर्मले विभिन्न प्रकारका पावरट्रेनलाई समर्थन गर्ने भएकाले विभिन्न बजारका आवश्यकता अनुसार पेट्रोल, हाइब्रिड वा इलेक्ट्रिक संस्करणमा पनि सो एसयूभी उपलब्ध हुन सक्ने सम्भावना रहेको छ।