रेनो काइगरको खुल्यो बुकिङ, २८ लाख ४९ हजार मूल्यका साथ नेपालकै सबैभन्दा सस्तो एसयूभी बन्दै

काठमाडौं – नेपाली बजारमा बहुप्रतीक्षित एसयूभी रेनो काइगरको बुकिङ खुलेको छ । नेपालका लागि आधिकारिक वितरक एड्भान्स्ड अटोमोबाइल्स प्रालिले सुरुवाती मूल्य २८ लाख ४९ हजार रुपैयाँ सहित बुकिङ खुलेको बताएको हो । रेनोका देशभर रहेका सोरुममार्फत बुकिङ गर्न सकिने छ ।

यो सँगै नेपालमा रेनो काइगरको प्रतीक्षा समाप्त भएको छ । नेपाली बजारमा उपलब्ध हुने यो सबैभन्दा सस्तो एसयूभी समेत बनेको छ ।

रेनो काइगर दुई पेट्रोल इन्जिन र तीन ट्रान्समिसन अपसनमा उपलब्ध छ । १.० लिटर नेचुरल्ली एस्पिरेटेड पेट्रोल इन्जिनले ७१ बीएचपी पावर र ९६ एनएम टर्क जेनेरेट गर्छ भने १.० लिटर टर्बोचार्ज्ड पेट्रोल इन्जिनले ९८ बीएचपी पावर र १६० एनएम टर्क जेनेरेट गर्छ । यसलाई ५ स्पीड म्यानुअल र सिभीटी गियरबक्समा सार्वजनिक गरिएको छ । रेनो क्विडबाट प्रेरित एसयूभी रेनो काइगरमा १६ इन्चको अलोय ह्विल दिइएको छ जसले गर्दा सो एसयूभी आकर्षक ड्युअल टोन डिजाइनमा देखिएको छ ।

रेनो काइगरमा स्प्लीट हेडल्याम्प, एलइडी डेटाइम रनिङ लाइट, स्पोर्टी रुफलाइन, ग्रे कलरको रुफरेल, सि सेप्ड एलइडी टेलल्याम्प, हाइ माउन्टेड टपल्याम्प, अगाडि र पछाडि दिइएको स्कीड प्लेट, व्ल्याक ह्वील आर्क, ड्यूल टोन ड्यासबोर्ड जस्ता फिचर पाउन सकिन्छ । त्यसैगरी यसमा ८ इन्चको टचस्क्रिन इन्फोटेनमेन्ट सिस्टम उपलब्ध छ जसले वायरलेस एप्पल कार प्ले र एन्ड्रोइड अटो सपोर्ट गर्दछ । यसका साथै काइगरमा ७ इन्चको फुल डिजिटल इन्ट्रुमेन्ट क्लष्टर, अटोमेटिक क्लाइमेट कन्ट्रोल, मल्टी फङ्गशनल स्टेरिङ, क्रुज कन्ट्रोल लगायतका  फिचर पनि पाउन सकिन्छ ।

रेनो काइगरले नेपाली बजारमा किया सोनेट, हुन्डाई भेन्यु, महिन्द्रा एक्सयूभी३००, सुजुकी भिटारा ब्रेजा, फोर्ड इकोस्पोर्ट, टाटा नेक्सन र निसान म्याग्नाइट जस्ता कारसँग सिधै प्रतिस्पर्धा गर्नेछ ।