सडक दुर्घटना पीडितहरुको गरियो सम्झना, विभिन्न माग प्रस्तुत

काठमाडौं – सडक दुर्घटना पीडितहरुको सम्झनामा आज एक कार्यक्रम गरिएको छ । सो अवसरमा न्यायको लागि हस्ताक्षर गरियो । त्यस्तै दुर्घटना पीडितहरुले सही नीति र कार्यक्रम, पूर्बाधारमा लगानी तथा सुरक्षित यात्राको अधिकार ग्यारेन्टीको समेत माग गरे । त्यस्तै दुर्घटना पश्चात उद्दार, उपचार र पुनर्स्थापना तथा कानुनी सहयोगको लागि राज्यसित माग गरे ।

कार्यक्रममा विभिन्न बिज्ञ तथा अभियानकर्ताहरुले पीडित र पुनःस्थापना बारेमा आफ्ना धारणा राखेका थिए । अन्तर्राष्ट्रिय अटोमोबाइल फेडेरेसन (एफआईए) का काउन्सिल मेम्बर गोबिन्द भट्टराई, सोसाइटी अफ ट्रान्सपोर्ट इन्जिनियर्स नेपालका अध्यक्ष डा पद्म बहादुर शाही, नेसनल एलायन्स फर सेफ एन्ड सस्टेनेबल ट्रान्सपोर्टका प्रवेश पौडेल र नासा नेपालका सचिव निरज खड्काले आ–आफ्नो धारणा राखेका थिए ।

त्यस्तै एकेडेमिक नेटवर्क फर ट्रान्सपोर्ट सेफ्टी रिसर्चका गिरिराज दहाल तथा युथ फर रोड सेफ्टी नेपालकी प्रकृति अर्याल लगायतले बिश्वकै पीडितका समस्या र उपाय बारेमा विचार प्रस्तुत गरेका थिए ।

एक बर्षभरी सडक दुर्घटनामा जीबन गुमाएकाहरुको स्मरण गरी शुरु भएको कार्यक्रममा हस्ताक्षर संकलन गरिएको हो । कार्यक्रममा अभियन्ता तथा दुर्घटना पीडित रामबहादुर तामाङ र कल्पना विष्टले नेपालभरिका दुर्घटना पीडितका अवस्था र आगामी दिनमा सरकारले गर्नु पर्ने कामको बारेमा अनुभव राखेका थिए ।

संयुक्त राष्ट्र संघले समेत मान्यता दिएको नोभेम्बर महिनाको तेस्रो आइतबार मनाइने यो दिबस नासा नेपाल लगायतका संस्स्थाले विगत एक दशक देखि नेपालमा मनाउदै आएका छन् । संसारमा करिब १३ लाखले जीबन गुमाउने सडक दुर्घटनाले नेपालमा बार्षिक ३ हजार ज्यादा ले ज्यान गुमाउँछन भने १० हजार बढी गम्भीर घाइते हुन्छन् ।