एक्सयुभी ७०० को वढ्दो अभाव, माग बढी कि उत्पादन कम ?

भारतको सबैभन्दा ठूलो एसयूभी उत्पादक कम्पनी महिन्द्रा एण्ड महिन्द्राले आफ्नो फ्ल्यागसिप मोडल एक्सयूभी ७०० लाई बजारमा उतोको १ वर्ष पुरा भएको छ । अघिल्लो वर्षको अगष्ट महिनामा लन्च गरिएको यो एसयूभी लन्च हुनु अगावै सर्वाधिक चासोको विषय वनिरहेको थियो ।

वुकिङ शुरु भएको २ दिनमै ५० हजार भन्दा बढी ग्राहकले वुक गरेको यो एसयूभीलाई हालसम्म जम्मा ४० हजार हाराहारी ग्राहकले मात्र हात पार्न सफल भएका छन् । अझै ८० हजार भन्दा बढी ग्राहकले यो गाडी हात पार्न प्रतिक्षा गरिरहेका छन् भने हरेक महिना औषतमा ९ हजार ८ सय हाराहारी वुकिङ भैरहेको छ ।

अहिले उत्पादन भैरहेको यो गाडीको संख्यालाई आधार मान्ने हो भने हालकै वुकिङ डेलिभरी गर्न अझै २ वर्ष लाग्नेछ । यसका वावजुत पनि कम्पनीले यो एसयूभीको वुकिङ लिन भने छाडेको छैन । विश्वव्यापी चीप अभावको समस्यासंग जुधिरहेको महिन्द्रा एन्ड महिन्द्राले निकट भविष्यमै यसको आपूर्ती सहज हुने र उत्पादन बढ्ने अनुमान लगाउँदै गाडीको वुकिङ सुचारु गरिरहेको बुझ्न सकिन्छ ।

भारतीय व्रान्डमा पहिलोपटक यो सेग्मेन्टमा एड्भान्स ड्राइभिङ असिस्ट सिस्टम(अडास) प्रयोग भएर आएको यो एसयुभीको उत्पादनमा समेत सोही फिचर्स वाधक वनिरहेको छ । अडासका लागी धेरैभन्दा धेरै चीप आवश्यक पर्ने र उक्त चीपको आपूर्तीमा आभाव कायम भएका कारण यो गाडीको उत्पादनमा समस्या आएको हो । साथै यो एसयूभीमा एड्भान्स टेक्नोलोजीमा आधारित एड्रिनो एक्स इन्फोटेन्मेन्ट सिस्टम जडान गरिएको छ । उक्त सिस्टमका लागी समेत धेरै संख्यामा चीप अवाश्यक पर्छ ।

यो एसयुभीमा महिन्द्राले भिस्टोनले विकास गरेको १०.२५ इन्चको मल्टि इन्फर्मेसन डिस्प्ले दिएको छ । जहाँ ६० भन्दा बढी कनेक्टेड फिचर्स सामेल गरिएका छन् । जसका लागी पनि ठूलो मात्रामा चीपको आवश्यकता पर्छ । यसरी फिचर्स लोडेड एसयूभी वनाएको महिन्द्रा एन्ड महिन्द्रालाई अन्तत सोही फिचर्सकै कारण उत्पादनमा समस्या निम्तिएपछि अहिले माग अनुसार यसको उत्पादन हुन सकिरहेको छैन ।

एक्सयूभी ७०० मा जस्तै नयाँ थार, एक्सयूभी ३०० र वोलेरोमा पनि उत्पादन कटौतीको समस्या यो कम्पनीले झेलिरहनु परेको छ । जसको सिधा असर नेपाली बजारमा समेत परेको छ । उत्पादन कम भएकै कारण थार र एक्सयूभी ७०० हालसम्म नेपाल आउन सकिरहेका छैनन भने वोलेरो र एक्सयूभी ३०० लाई समेत ग्राहकले भनेकै समयमा खरिद गर्न पाइरहेका छैनन् ।