नोभेम्बर ८ मा सार्वजनिक हुँदै रोयल इन्फिल्ड सुपर मेटियर ६५०, टिजर सार्वजनिक

रोयल इन्फिल्ड सुपर मेटियर ६५० बाइकको टिजर सार्वजनिक भएको छ । सो बाइक आगामी नोभेम्बर ८ मा इटालीको मिलानमा हुने ईआईसीएमए २०२२ मोटर शोमा सार्वजनिक गरिने छ ।

यसको आधिकारिक नाम कम्पनीले सार्वजनिक गरेको छैन तर यसको नाम ‘सुपर मेटियर ६५०’ हुने र मेटियर ३५० जस्तै हुने अनुमान गरिएको छ ।

नयाँ सुपर मेटियर ६५० बाइक इन्टरसेप्टर ६५० र कन्टिनेन्टल जीटी ६५० को प्लेटफर्ममा आधारित हुनेछ । यसको इन्जिन र ट्रान्समिसनमा पनि धेरै परिवर्तन हुनेछ ।

सुपर मेटियर ६५० बाइक क्रुजर बाइक हो । यसमा ६४८ सीसीको इन–लाइन ट्विन सिलिन्डर, एयर कुल्ड इन्जिन जडान गरिएको छ । जसले ४७ बीएचपी पावर र ५२ एनएम टर्क जेनेरेट गर्छ । यसमा ६ स्पिड गियरबक्सको साथै स्लिप एण्ड असिस्ट क्लच उपलब्ध हुनेछ ।

सो बाइकमा आवश्यकता अनुसार नयाँ च्यासिस अपडेट हुने सम्भावना बढी छ । सुपर मेटियर ६५० बाइकमा एलईडी लाइट, सेमी–डिजिटल मिटर क्लस्टर, ब्लुटुथ कनेक्टिभिटी, डिस्क ब्रेक, स्लिप एण्ड असिस्ट क्लच, ड्युअल च्यानल एबीएस र ट्रिपर टर्न–बाई–टर्न नेभिगेसन सिस्टम जस्ता फिचर हुनेछ ।

कम्पनीले जारी गरेको टिजरमा बाइकको पछाडिको भाग मात्र देख्न सकिन्छ । यसमा मेटियर ३५० मा जस्तै एलईडी टेलल्याम्प देख्न सकिन्छ । यसमा ट्विन एक्जस्ट र स्प्लिट सिटहरू छन् । जे–प्लेटफर्ममा आधारित स्वीच गियर पनि दिइएको छ । टिजरमा ट्रिपर नेभिगेसन सिस्टम पनि देखिन्छ ।

नयाँ सुपर मेटियर ६५० बाइक २०२२ मा भारतमा लन्च हुने सम्भावना छ र २०२३ को शुरुवातमा बिक्रीको लागि उपलब्ध हुनेछ । नेपालमा पनि आउने सम्भावना भने हुन सक्छ ।