पानी परेको समयमा सवारी साधनमा यात्रा गर्दा यी कुरामा ध्यान दिऔं

    मृत्यु, गम्भीर घाइते, घाइते, बेपत्ता, अलपत्र, विस्थापित, घरबारविहीन आदि । हरेक वर्ष बर्षायाम सुरु भएसँगै तपाई हामीले पढ्ने, हेर्ने र सुन्ने प्रमुख समाचार यिनै हुन्, यस्तै हुन् । हरेक वर्ष बर्षात्को समयमा हाम्रा लागि यी समाचारहरु नियति झै बनेका छन् । बर्षायाम सुरु भएपछि देशभरकै सडकको यात्रा जोखिमपूर्ण बन्दा तपाई हाम्रो यात्रा पनि जोखिमपूर्ण बनेको छ । 

वर्षायाममा सडक अवरुद्ध हुँदा सवारी साधनमा सर्वसाधारणको सहज पहुँच हुन सकिरहेको पाइँदैन । मुलुकका विभिन्न स्थानमा मौसमी प्रभावका कारण भएका सवारी दुर्घटनामा थुप्रै नागरिकले ज्यान गुमाएका र कैयौँ घाइते भएका दुःखद समाचार आइरहेका छन् ।

संसारका सबैजसो तथा विशेषतः विकासोन्मुख देशमा जस्तै नेपालमा पनि ठूलो जनसंख्याका निम्ति सडक यात्रा विकल्पविहीन माध्यम हो । सडक यात्रा ‘हुने–खाने देखि लिएर हुँदा–खाने’ सम्मको निर्विकल्प माध्यमसँगै यो हाम्रो जीवनशैली पनि हो । यद्यपि हामी कहाँ राष्ट्रिय राजमार्गकै अवस्था माथि प्रश्न उठिरहँदा तपाई हामी पनि यात्राका बखत गम्भीर अनि संवेदनशील भएर यात्रा गर्नुपर्दछ ।

आउनुहोस् विशेषतः बर्षाको समयमा यात्रा गर्दा सुरक्षाका निम्ति अपनाउनुपर्ने सावधानीका बारेमा जानकारी राखौ ।

पानीले बाहिरको देखाई अर्थात पारदर्शिता (Visibility) कम गर्छ र टायरको ग्रिप घटाउँछ, रोकिने दुरी बढाउँछ । पानी परेको बेलामा रोकिने दुरी दोब्बर हुने भएकोले सुरक्षित गतिमा मात्रै सवारी चलाउनु पर्छ ।

पानीले गर्दा सवारी दायाँ बायाँ मोड्न समेत अप्ठ्यारो पार्छ । तसर्थ मोड तथा घुम्तिमा, चोक जक्सनहरुमा तथा यू टर्न, राईट टर्न गर्दा विशेष सुरक्षा सावधानी अपनाउनु पर्दछ ।

सिसा ऐनाहरु तथा लाइटहरु बारम्बार सफा गर्नुपर्दछ ।

वासर बोटर, वाइपर ब्लेड आदि चेक गर्ने र यदि खिइएको वा राम्रोसँग काम नगर्ने अवस्था छ भने समयमै बदल्नु पर्दछ ।

पानी परेको समयमा सवारी साधन चलाउँदा डिप्ड हेडलाइट प्रयोग गर्ने ।

स्पिड घटाउने कम स्पिडमा चलाउने ।

गाडी पुछ्नका लागि सुक्खा कपडा गाडी भित्र राख्ने ।

विन्डो हिटर तथा हावाले सिसामा लागेको बाफ हटाउने, आवश्यक परे सिसा केही खोल्ने ।

अर्को सवारीले पानी छ्यापी तपाइको सिसा तत्काल नदेखिने हुन सक्छ । यसमा सचेत बन्नुहोस् ।

सडकमा भएको पानी याद गर्नुहोस ।

पैदल यात्रीको नजिकबाट जाँदा पानी, हिलो छ्यापिन सक्छ र विचार पु-याउनु होस ।

बाढीको समयमा खोला, नाला, तर्दा विचार पु-याउनु होस्

फोर ह्विलको प्रयोग गर्नुहोस ।

पानी पार गरे पछि बिस्तारै ब्रेक पम्प गरी ब्रेक चेक गर्नुहोस ।

विष्णु थापा
ट्राफिक प्रहरी वरिष्ठ नायव निरीक्षक