सुदूरपश्चिमाञ्चल अटोमोबाइल्स एसोसिएसनको अध्यक्षमा पुष्कर ओझा

सुदूरपश्चिमाञ्चल अटोमोबाइल्स एसोसिएसनको अध्यक्षमा पुष्कर ओझा निर्वाचित भएका छन्। धनगढीमा सम्पन्न साधारण सभाद्वारा ओझाको नेतृत्वमा संघको नयाँ कार्यसमिति निर्विरोध निर्वाचित भएको हो ।

सुदूरपश्चिम खेलकुद परिषद्का सदस्य सचिव दिपक बहादुर सिंहले सो साधारण सभाको उदघाटन गरेका थिए । कार्यसमितिको उपाध्यक्षमा श्याम जोशी, सचिवमा प्रजापति जोशी र कोषाध्यक्षमा स्मारिका बम निर्वाचित भए ।

त्यसैगरी सदस्यहरुमा सुमन सैंजू, एलिस भण्डारी र दीपेन्द्र राना चयन भए भने विनोद बलायरलाई समितिको सदस्य मनोनित गरियो ।

साधारण सभाले धनगढी अटोक्रस र -याली, मोटरसाइकल फ्ल्याट रेसिङ्, टुरिङ -याली तथा सडक सुरक्षाको लागि युवा कार्यशाला जस्ता कार्यक्रम समेत पारित गरेको छ।

कर्णाली प्रदेश खेलकुद परिषदका पूर्व सदस्य सचिब विश्वामित्र सञ्जेल र नेपाल अटोमोबाइल्स एसोसिएसन ट्रेनिङ तथा मार्शल कमिसनका सचिब आशिष रौनियारले नवनिर्वाचित पदाधिकारी तथा सदस्यहरुलाई बधाइ दिएका थिए ।

सो अवसरमा एफआईए वर्ल्ड काउन्सिल मेम्बर गोविन्द भट्टराईले राष्ट्रिय संघ र अन्तर्राष्ट्रिय महासंघहरूका क्यालेण्डर बारेमा प्रकाश पारेका थिए ।

यो भन्दा पहिले ओझाकै नेतृत्वमा तदर्थ समिति कार्यरत थियो । अहिले भने साधारण सभाले नयाँ कार्यसमिति सर्वसम्मत रुपमा निर्वाचित गरेको हो ।