प्योर ईभीले ल्याउँदै छ पेट्रोलबाट चल्ने जस्तै पावरफुल इलेक्ट्रिक मोटरसाइकल, नेपालमा पनि आउने

भारतीय कम्पनी प्योर ईभीले नयाँ इलेक्ट्रिक मोटरसाइकल इट्रिस्ट ३५० लन्च गर्ने भएको छ । हैदरावादस्थित आईआईटीमार्फत प्रवद्र्धन गरिने सो इलेक्ट्रिक मोटरसाइकल आगामी मार्च महिनाको अन्त्यसम्ममा परीक्षणको लागि तयार हुने बताइएको छ ।

अगस्त १५ मा भारतको स्वतन्त्रता दिवसका दिन लन्च गर्ने गरी यो मोटरसाइकल उत्पादन कार्य भइरहेको छ । यो भन्दा पहिले डेमोका लागि करिव ५० युनिट उपलब्ध हुने छन् । पेट्रोलियम पदार्थबाट चल्ने मोटरसाइकल जस्तै पिकअप र पावर हुने दावी गरिएको सो इलेक्ट्रिक मोटरसाइकलको मूल्य भने कम हुनेछ ।

प्रारम्भमा भारतको बैंग्लोर, हैदराबाद र पुनेमा उपलब्ध हुने सो मोटरसाइकल विस्तारै अन्य स्थानमा समेत उपलब्ध हुनेछ ।

नेपाली बजारमा प्योर ईभीको आधिकारिक वितरकको रुपमा ह्वाइट लोटस मोटर्सले कार्य गरिरहेको छ । नेपालमा समेत यो मोटरसाइकल बिक्रीका लागि उपलब्ध हुने र यसका लागि कम्पनीबाट स्वीकृत प्राप्त भइसकेको ह्वाइट लोटसका म्यानेजिङ डाइरेक्टर अशोक खड्गीले जानकारी दिए ।

सो मोटरसाइकलको टप स्पिड ८५ किमी प्रतिघण्टा सम्म हुनेछ । सिंगल चार्जमा यसलाई १२० किमी सम्म चलाउन सकिने छ । यसमा ३.५ किलोवाट आवरको ब्याट्री प्रयोग हुनेछ र ब्याट्रीको वारेन्टी ५ वर्ष हुनेछ ।

प्योर ईभी आईआईटी हैदरावादमा स्थापना भएर विकास भएको कम्पनी हो । नेपाली बजारमा हालै यो ब्रान्डका इलेक्ट्रिक स्कुटर भित्रिएका छन् ।