चर्चामा पल्सर एनएस ४०० जेड, यस्तो छ मूल्य र फिचर

काठमाडौं– नेपाली बजारमा सर्बाधिक सफल मोटरसाइकलका रुपमा परिचित बजाज पल्सरको सबैभन्दा ठूलो इन्जिन जडित मोडल एनएस ४०० जेड अहिले चर्चामा छ । यो नयाँ मोटरसाइकललाई हंसराज हुलासचन्द एण्ड कम्पनीले हालै सम्पन्न नाडा अटो शो २०२४ मा लन्च गरेको हो ।

लामो समयदेखि प्रतिक्षित बजाज पल्सर एनएस ४०० जेड मा ३७३ सीसीको सिंगल–सिलिन्डर, लिक्विड–कूल्ड इन्जिन समावेश रहेको छ जसले ३९.४ ब्रेक हर्स पावर र ३५ एनएमको टर्क दिन्छ । ६ गियरसम्मको गियरबक्स रहेको यस मोटरसाइकलमा गियर परिवर्तन निकै सहज रहेको छ । साथै पल्सर एनएस ४०० जेडमा राइड–बाई–वाईर प्रविधि पनि समावेश छ, जसले राम्रो थ्रोटल रेस्पोन्स दिनुका साथै पेट्रोलको खपत पनि कम गर्दछ ।

पल्सर एनएस ४०० जेड अहिलेसम्मकै सबैभन्दा उत्कृष्ट मोडल रहेको कम्पनीको दाबी छ । यसमा रोड, रेन, स्पोर्ट, र अफ–रोड गरी चारवटा राइडिङ मोडहरू समावेश गरिएका छन् । साथै स्विच गर्न सकिने ट्रयाक्सन कन्ट्रोल र डुअल–च्यानल एबिएस पनि यसमा उपलब्ध छ, जसले सबै अवस्थाको रोडमा उत्कृष्ट सुरक्षा सुनिश्चित गर्दछ ।

बाइकमा ब्लुटुथ कनेक्सन सहितको नयाँ फुल–कलर एलसिडी स्क्रिन पनि समावेश रहेको छ जसले टर्न–बाई–टर्न नेभिगेसन, म्युजिक कन्ट्रोल र अन्य आवश्यक राइड डेटा पनि प्रदान गर्दछ ।

मस्कुलर र एरोडाइनामिक प्रोफाइलको साथ डिजाइन गरिएको पल्सर एनएस ४०० जेडमा उत्कृष्ट डिजाइनको फ्यूल ट्यांक, आरामदायी स्प्लिट–सीट र स्टाइलिश १७–इन्च एलोय ह्वील दिइएको छ । १२ लिटर क्षमताको पेट्रोल ट्यांक र ८०७ मिलिमिटरको सीटको उचाइ रहेकोले पल्सर एनएस ४०० जेड सिटी राइड र लामो दूरीको यात्रा दुवैका लागि उपयुक्त छ ।

बजाजले यो नयाँ मोटरसाइकलमा डोमिनार ४०० कै इन्जिन राखेको हो । एउटै इन्जिन र लगभग उस्तैउस्तै फिचर भएपनि पल्सर एनएस ४०० जेड डोमिनार ४०० भन्दा ४० हजार रुपैँयाले सस्तो छ । डोमिनार ४०० को मूल्य ६ लाख निर्धारण गरिएकोमा एनएस ४०० जेडलाई भने जम्मा ५ लाख ६० हजार रुपैँयामात्र पर्छ । एउटै इन्जिन र लगभग समान फिचर भएर पनि मूल्यमा भने ४० हजार रुपैयाँ अन्तर भएका कारण अहिले पल्सर एनएस ४०० जेड युवा राइडरमाझ चर्चाको विषय बनिरहेको छ ।