बीवाईडीले एउटा कारमा १२५० डलर नाफा राख्दा टेस्लाको ८२५० डलर

बीवाइडीले एकदमै कम नाफा राखेर कार बिक्री गर्ने गरेको पाइएको छ । एक तथ्यांक अनुसार सन् २०२३ मा बीवाइडीले एउटा कारमा सरदर १२५० डलर नाफा राख्दा उसको प्रतिस्पर्धी टेस्लाले भने प्रति कार ८२५० डलर नाफा राखेर बिक्री गर्ने गरेको पाइएको हो ।

नाफामा देखिएको यति ठूलो अन्तरले बीवाइडी तत्कालै नाफा आर्जन गर्नभन्दा पनि आफ्नो बजार हिस्सालाई थप मजवुत बनाउने केन्द्रित भएको देखाउँछ । सन् २०२३ मा टेस्लाले १८ लाख कार बिक्री गरेर १४.९ विलियन डलर नाफा आर्जन गरेको थियो ।

उक्त वर्ष बीवाइडीले चीनमा २७ लाख बढी न्यू इनर्जी भेइकल बिक्री गर्दा टेस्लाको बिक्री ६ लाख हाराहारी मात्रै थियो । सन् २०२१ अघिसम्म प्रति कार बिक्रीमा नोक्सान बेहोर्दै आएको बीवाइडीले त्यसयता भने आफ्नो संचिती नाफालाई ८ गुणासम्म बृद्धि गरेको जनाइएको छ ।

बीवाइडी कारको बिक्रीमा उछाल आएसंगै कम्पनीले हरेक कारको बिक्रीबाट आर्जन हुने नाफामा समेत बृद्धि गर्दै लगेको छ । सन् २०२२ मा कम्पनीले एक यूनिट कारमा ७५० डलर नाफा आर्जन गरेको थियो ।