२२० सीसीको एकमात्र क्रुजर बाइक बजाज एभेन्जर, यस्तो छ मूल्य, पावर र फिचर

क्रुजर बाइकको प्रमुख विशेषता भनेकै आरामदायी यात्रा हो । सिट हाइट कम हुने कारण होँचो कदका राइडरले समेत यस्ता बाइकलाई सहजै गुडाउन सक्छन् । अर्कोतर्फ यस्ता बाइक पावर र पर्फमेन्सको मामलामा समेत निकै शक्तिशाली मानिन्छन् । आरामदायी यात्राका लागि सहज होस् भनेर यी बाइकको सिट पोजिसन विशेष तवरबाट मिलाइएको हुन्छ ।

नेपाली बजारमा अहिले विभिन्नि ब्रान्डका क्रुजर बाइक उपलब्ध छन् । यीमध्ये अधिकांश ब्रान्डका यस्ता बाइक ३०० सीसी भन्दा बढी क्षमतामा उपलब्ध रहेपनि बजाजले भने २२० सीसीमै एभेन्जरलाई उपलब्ध गराइरहेको छ ।

कम मूल्यमा क्रुजर बाइकको मज्जा लिन चाहने राइडरको रुचिमा पर्दै आएको एभेन्जर २२० लाई आधिकारिक बिक्रेता हंसराज हुलासचन्द एण्ड कम्पनी प्रालिले विगत लामो समयदेखि बिक्री गर्दै आइरहेको छ । एभेन्जर २२० सीसी सेग्मेन्टमा उपलब्ध नेपालको एकमात्र क्रुजर बाइक पनि हो । यो बाइकको मूल्य ४ लाख ५ हजार ९ सय रुपैयाँ निर्धारण गरिएको छ ।

एभेन्जर २२० मा २२० सीसी क्षमताको सिंगल सिलिन्डर, आयल कुल्ड, डीटीएसआई इन्जिन जडान गरिएको छ । जसको अधिकतम पावर १९.०३ पीएस र टर्क १७.५ एनएम छ । १३ लिटर क्षमताको फ्युल ट्यांक दिइएको यो बाइकमा ५ स्पिड गियरवक्स जडान गरिएको छ । ११८ किलोमिटर प्रतिघन्टाको उच्च गतिमा हाँक्न सकिने एभेन्जरले प्रति लिटर पेट्रोलको खपतमा ४० किलोमिटर माइलेज दिने दावी गरिएको छ ।

मूल्यमा प्रतिस्पर्धा गर्न सहज होस् भनेर हुनसक्छ, बजाजले यसको लाइटिङ र ब्रेकिङ सिस्टममा भने पुरानै प्रविधि दिएको छ । प्रायः मोटरसाइकलमा अहिले एलईडी लाइट र एबीएस उपलब्ध रहँदै आएपनि एभेन्जर २२० मा भने हेलोजन हेडल्याम्प र टेलल्याम्प पाउन सकिन्छ । यसैगरी यसको अगाडि चक्कामा मात्र डिस्क व्रेक दिइएको छ भने पछाडि ड्रम व्रेक छ । यसमा एबीएस समेत पाउन सकिँदैन ।

एभेन्जर २२० मा बजाजले ठूलो साइजको विन्डशिल्ड दिएको छ । यसमा डिजिटल इन्स्ट्रयुमेन्ट क्लस्टर पाउन सकिन्छ । बाइकको अगाडि एन्टि फ्रिक्सन वुस सहितको टेलिस्कोपिक सस्पेन्सन जडान गरिएको छ भने पछाडि ट्वन सक एव्जर्वर दिइएको छ । यसको सिट हाइट जम्मा ७३७ एमएम रहेको छ भने ग्राउन्ड क्लियरेन्स १६९ एमएम छ ।