नेपालमा कियाको सबैभन्दा सस्तो र महंगो कार कुन ? यस्तो छ सबै मोडलको मूल्य

काठमाडौं – कियाको नेपालका लागि आधिकारिक वितरक कन्टिनेन्टल ट्रेडिङ इन्टरप्राइजेजले नेपाली बजारमा हाल दुई मोडलका इलेक्ट्रिक कार ईभी६ र ईभी९ का साथै पेट्रोलियम पदार्थबाट चल्ने दुई गाडी सोनेट र सेल्टोस बिक्री–वितरण गरिरहेको छ ।

७७.४ किलोवाट आवरको ब्याट्री प्याक भएको किया ईभी६ को मूल्य १ करोड २५ लाख रहेको छ भने ७६.१ किलोवाट आवरको ब्याट्री प्याक भएको ईभी९ को मूल्य १ करोड ७९ लाख ९० हजार रुपैयाँ रहेको छ । प्रिमियम ईभी किन्न चाहने ग्राहकलाई लक्षित गरिएका यी दुई मोडलका ईभी दक्षिण कोरियामा उत्पादन हुन्छन् ।

किया सोनेट र सेल्टोस भने भारतमै उत्पादन हुने गरेका छन् । किया सोनेट विभिन्न ५ भेरिएन्टमा उपलब्ध छ । यसको मूल्य ४२ लाख ९० हजार देखि ६३ लाख ९० हजार रुपैयाँ सम्म छ ।

त्यसैगरी किया सेल्टोस विभिन्न ९ भेरिएन्टमा उपलब्ध छ । यसको मूल्य ५२ लाख ९० हजार देखि ८१ लाख ९० हजार रुपैयाँ सम्म छ ।

कियाका गाडीहरु डिजेल इन्जिन र पेट्रोल इन्जिन दुवैबाट चल्ने छन् । त्यसैगरी किया सोनेटको माथिल्लो भेरिएन्ट एचटीएक्स एटीमा इलेक्ट्रिक सनरुफ र प्याडल सिफ्टर लगायतका विशेषता छन् ।

किया सोनेटमा एलईडी हेडलाइटका साथ एलईडी डीआरएल छ, जुन साइड इन्डिकेटरसँग इन्टिग्रेटेड छ । एलईडी हेडलाइटलाई कियाले क्राउज ज्वेल भन्ने गरेको छ । यसमा टर्बो आकारको फ्रन्ट सिक्ड प्लेट समेत छ ।

सो कम्प्याक्ट एसयूभीमा १०.२५ इन्चको टचस्क्रिन इनफोटेनमेन्ट सिस्टम उपलब्ध छ । त्यसैगरी यसमा बोसको ७ स्पिकर सिस्टम, इलेक्ट्रिक सनरुफ, फ्रन्ट भेन्टिलेटेड सिट छन् । सो कारलाई स्मार्टवाचसँग कनेक्ट गर्न पनि सकिन्छ । यसको ड्यासबोर्ड धेरै हद सम्म किया सेल्टोस जस्तै छ, जसमा युभिओ कनेक्टिभिटीको विकल्प उपलब्ध हुनेछ ।

यसमा ६ एयरब्याग, ईबीडीका साथ एबीएस, फ्रन्ट र रियर पार्किङ सेन्सर, टायर प्रेसर मोनिटरिङ सेन्सर, अटो हेडलाइट, ब्रेक असिष्ट, इलेक्ट्रोनिक स्टेबिलिटी कन्ट्रोल जस्ता आधुनिक फिचर उपलब्ध छन् ।

सेल्टोसमा इलेक्ट्रोनिक पार्किङ ब्रेक, हिल स्टार्ट असिस्ट कन्ट्रोल, नर्मल, इको र स्पोर्ट ड्राइभिङ मोड जस्ता विशेषता रहेका छन् ।

यस एसयूभीमा १७ इन्च अलोय व्हिल, स्टाइलिस एलईडी टेललाइट, सार्प एलईडी हेडलाइट, एलईडी फगल्याम्प रहेको छ ।