बेनेलीका बाइकको बढ्यो मूल्य, एउटै बाइकमा १ लाख १५ हजार सम्म मूल्य वृद्धि (सूची सहित)

काठमाडौं – नेपाली बजारमा उपलब्ध बेनेलीका विभिन्न मोडलका बाइकको मूल्य वृद्धि भएको छ । नेपालका लागि बेनेलीको आधिकारिक वितरक केटीएम इन्टरनेसनल ट्रेडिङले सार्वजनिक गरेको नयाँ मूल्य सूची अनुसार सबैभन्दा बढी बेनेली ३०२एस र ३०२एस (नियोन) को मूल्य बढेको छ ।

यी दुई मोटरसाइकलको मूल्य एकै पटक १ लाख १४ हजार ९ सय रुपैयाँले बढेको हो । ३०२एस को मूल्य पहिले ९ लाख ३५ हजार भएकोमा अब १० लाख ४९ हजार ९ सय पुगेको छ भने ३०२एस (नियोन) को मूल्य पहिले ९ लाख ६० हजार भएकोमा ब १० लाख ७४ हजार ९ सय रुपैयाँ पुगेको छ ।

त्यसैगरी बेनेली टीएनटी १५० आईको मूल्यमा ३४ हजार ७३० रुपैयाँ बढेको छ । पहिले यो मोटरसाइकलको मूल्य ३ लाख ४३ हजार १७० भएकोमा अब ३ लाख ७७ हजार ९ सय रुपैयाँ पुगेको छ ।

बेनेली १८०एस र १८०एस (नियोन) को मूल्यमा १९ हजार ९ सय रुपैयाँ बढेको छ । यी दुई मोटरसाइकलको मूल्य अब क्रमशः ४ लाख ४९ हजार ९ सय र ४ लाख ५९ हजार ९ सय रुपैयाँ पुगेको छ ।

सबैभन्दा कम मूल्य टीएनटी १५ मा बढेको छ । यसको मूल्य पहिले २ लाख ४७ हजार ५ सय भएकोमा ७ हजार ४ सय रुपैयाँ बढेर अब २ लाख ५४ हजार ९ सय रुपैयाँ पुगेको छ ।

बेनेली ग्रुपले नै उपलब्ध गराइरहेको किवी ब्रान्डका मोटरसाइकल र बेनेलीकै अन्य मोडलका मोटरसाइकलको मूल्य भने यथावत छ ।

बेनेली चीनमा उत्पादन हुने इटालियन ब्रान्ड हो । विश्वमै अभाव झेलिरहेको सेमी कन्डक्टरलगायतका विभिन्न चिप र इलेक्ट्रिकलको प्रभाव यसमा पनि परेको र कन्टेनरको मूल्य समेत बढेकाले यसको प्रभाव नेपालमा समेत परेको कम्पनी स्रोतले बताएको छ ।