भारतमा महंगो भए यी कार, नेपालमा समेत मूल्य बढ्न सक्ने

भारतमा अहिले बिभिन्न अटो उत्पादकहरुले गाडीको मूल्य बढाइरहेका छन् । नयाँ बर्ष २०२२ प्रारम्भ भएसंगै शुरु भएको मूल्य बृद्धिमा हालसम्म टोयोटा, हुन्डाई, स्कोडा, फक्सवागन र एमजी सामेल छन् । भारतमा हरेक नयाँ बर्षमा सवारीसाधनको मूल्य हेरफेर हुने पुरानै प्रचलन हो । सोही प्रचलनलाई निरन्तरता दिंदै केही कम्पनीले मूल्य बढाइसकेका छन् भने अन्य कम्पनीले समेत बढाउन तयारी गरिरहेका छन् । भारतमा मूल्य बृद्धि हुँदा त्यसको सिधा असर नेपाली बजारमा समेत पर्ने हुँदा नेपालमा समेत यी गाडीको मूल्य बृद्धि हुने देखिन्छ ।

प्राप्त जानकारीका अनुसार हालसम्म टोयोटाले आफ्ना सबैजसो मोडलमा मूल्य बृद्धि गरेको छ । उसले ६६ हजार देखी १ लाख १० हजार भारुसम्म मूल्य बढाएको हो । सबैभन्दा बढी मूल्य बृद्धि फर्चूनरमा गरिएको छ । यो एसयूभीमा कम्पनीले १ लाख १० हजार रुपैयाँसम्मले मूल्य बृद्धि गरेको हो । जसका आधारमा यो एसयुभी अब नेपाल आउँदा ५ लाख रुपैयाँसम्म महंगो हुने अनुमान गरिएको छ ।

त्यसैगरी एमजी मोटर्सले एस्टर, हेक्टर र ग्लोस्टमा मूल्य बढाएको छ । केही समयअघिमात्र लन्च गरिएको एस्टरको मूल्य ३५ हजार भरुसम्म बृद्धि गरिएको छ भने नेपाली बजारमा समेत उपलब्ध हेक्टरको मूल्य ७० हजार भारुसम्म बृद्धि भएको छ । जसअनुसार हेक्टरको मूल्य नेपाली बजारमा ३ लाख हाराहारीले बढ्ने देखिन्छ । त्यसैगरी सबैभन्दा बढी बृद्धि ग्लोस्टरमा गरिएको छ । यो एसयुभीको मूल्य १ लाख ३२ हजार भारुसम्म बृद्धि गरिएको हो ।

हुन्डाइले क्रेटा, भेन्यू र अल्काजारमा थोरैमात्र रकम बृद्धि गरेको छ । उसले क्रेटामा ७ हजार र भेन्यूमा २ हजार १ सय रुपैयाँ बृद्धि गरेको छ भने अल्काजारमा २२ हजार भारु बृद्धि गरेको छ । यस आधारमा क्रेटा र भेन्यूको मूल्य नेपाली बजारमा खासै बृद्धि हुने देखिदैन ।

फक्सवागन र स्कोडाले समेत नयाँ एसयुभी टाइगुन र कुसाकको मूल्य बढाएका छन् । यी एयुभीको मूल्य ४५ हजार भारुले बृद्धि भएको हो । यी दुबै एसयुभी नेपाली बजारमा समेत उपलब्ध भएका कारण यसको असर नेपाली बजारमा समेत पर्ने देखिएको छ । नेपालमा यी एसयुभी २ लाख हाराहारी महंगो पर्ने अनुमान लगाउन सकिन्छ ।