एमभी दुगड ग्रुपले ल्यायो शक्तिशाली इन्डोनेसियन इलेक्ट्रिक स्कुटर, घिसिङले गरे सार्वजनिक

काठमाडौं – एमभी दुगड ग्रुप अन्तर्गतको विवेक अटोमोबाइल्स प्रालिले इन्डोनेसियन ब्रान्ड जेसिस्ट्सको इलेक्ट्रिक स्कुटर नेपाली बजारमा सार्वजनिक गरेको छ । एक कार्यक्रमका बीच नेपाल विद्युत प्राधिकरणका कार्यकारी निर्देशक कुलमान घिसिङले सो स्कुटर सार्वजनिक गरे ।

कार्यक्रममा बोल्दै घिसिङले विद्युत खपत बढाउन विद्युतीय साधनलाई प्राथमिकता दिनुपर्ने बताए । खरिद पछि मर्मत खर्च कम लाग्ने र इन्धनको मूल्य जोगिने भएकाले विद्युतीय सवारी लाभदायक रहेको घिसिङले बताए । उनले विद्युतीय सवारीलाई प्रवद्र्धन गरिने कार्यक्रममा आफू सधै उत्साहका साथ संलग्न रहने गरेको समेत बताए ।

सो अवसरमा ग्रुपका अध्यक्ष मोतीलाल दुगड, उपाध्यक्ष विवेक दुगड, निर्देशक विजय महतो र जेसिट्स ब्रान्डको एमभी दुगड ग्रुप नेपालका प्रमुख कनक जमरको उपस्थिति रहेको थियो ।

यो नेपालमा उपलब्ध अहिले सम्मको सबैभन्दा ठूलो टायर भएको विद्युतीय स्कुटर भएको कम्पनीको भनाइ छ । अन्य स्कुटरमा नभएको मोनोसक यसमा रहेको छ, जसले गर्दा ग्राभेल सडक तथा खाल्डाखुल्डी भएको सडकमा समेत लचकतापूर्ण तरिकाले चलाउन सकिन्छ ।

रातो, सेतो र कालो गरी ३ वटा रंगमा उपलब्ध भएको यस स्कुटरमा ५ किलोवाटको मोटर जडान गरिएको छ । यसका कारण यो नेपालमा उपलब्ध सबैभन्दा शक्तिशाली विद्युतीय स्कुटर मान्न सकिन्छ । त्यसैगरी यसमा ड्राइभ बेल्ट समेत रहेको छ ।

सो इलेक्ट्रिक स्कुटरमा ७२ भोल्ट, २० एएचको लिथियम आयोन ब्याट्री जडान गरिएको छ, जसले सिंगल चार्जमा १०० किलोमिटरको रेन्ज दिन्छ । यसलाई ९० मिनेटमा फुल चार्ज गर्न सकिन्छ ।

ब्याट्रीमा भएको बीडीएमएसका कारण ब्याट्री सुरक्षित हुन्छ । ब्याट्रीमा ३ वर्षको ग्यारेन्टी उपलब्ध गराइने छ र यसलाई चार्ज गर्न १.३ युनिट विद्युत खपत हुन्छ ।

जेसिस्ट्स इलेक्ट्रिक स्कुटरमा आधुनिक डिस्क ब्रेकको सुविधा छ र ब्रेकिङ गर्दा स्वचालित रुपमा रिचार्ज हुन्छ । यसको मोटर प्रणाली ओएसमा जडान गरिएकाले स्मार्टफोनमार्फत यसको गति, आरपीएम, तापक्रम, भोल्टेज आदि निगरानी गर्न सकिन्छ ।

स्कुटरको चेसिस बडीमा एक इन्च ब्यासको ट्युबुलर स्टिल र कालो फाइबर प्लास्टिक प्रयोग गरिएको छ । अगाडिको डिजाइन शार्क स्नाउट र एचआईडी हेडल्याम्प रहेको छ ।

राइडर र यात्रुका लागि गुणस्तरीय र आरामदायी सिट रहेका छन् । एलईडी टेलल्याम्प, बेल्ट ड्राइभ, डबल डिस्क ब्रेक, रियर मोनोसक, डिजिटल ड्यासबोर्ड, पन्च फुट रेस्ट आदि रहेका छन् ।

राइड बाई वायर इलेक्ट्रिक थ्रोटल, बीएलडीसी मोटर, एयरकुल्ड सिस्टम, पुली बेल्ट ट्रान्समिसन, २ हजार वाट रेट भएको पावर आउटपुट र ५ हजार वाट पिक पावर, ६.७ हर्स पावर, अधिकतम ३० एनएमको टर्क र ७६ किलोमिटरको अधिकतम गति आदि यसका विशेषता छन् ।

इसमा इको, अर्बान र स्पोर्ट गरी तीन मोड छन् भने ५ सेकेन्डमा ० देखि ५० किलोमिटर प्रतिघण्टा सम्मको गति लिन सक्छ ।
सिंगल ब्याट्रीयुक्त स्कुटरको मूल्य ३ लाख ५० हजार र डबल ब्याट्रीयुक्त स्कुटरको मूल्य ४ लाख १० हजार रुपैयाँ तोकिएको छ ।

जेसिस्ट्स अर्थात गरान्सिन्डो इलेक्ट्रिक स्कुटर आईटीएस इन्डोनेसियन सरकारको प्रमुख लगानी रहेको विश्वासिलो कम्पनी हो ।