सर्भिस इन्जिनियरको पोस्ट लकडाउन बाइक राइडिङ टिप्स : बाइक चलाउनु अघि ध्यान दिनु पर्ने कुराहरु

काठमाडौं उपत्यका र देशका धेरै स्थानमा जारी निषेधाज्ञा केही खुकुलो गरिएको छ । यो अवस्थामा जोर विजोर प्रणाली अनुसार मोटरसाइकल र अन्य सवारी साधन चलिरहेका छन् ।

घरमा लामो समय थन्क्याएर राखिएका सवारी साधन एकै पटक संचालनमा ल्याउनु भन्दा पहिले आफ्नो मोटरसाइकल वा स्कुटरको विभिन्न पक्षको वारेमा चेकजाँच गर्नु आवश्यक हुन्छ ।

सबैभन्दा पहिलो नम्बरमा ब्रेकमा ध्यान दिनुपर्छ । बाइक स्टार्ट भएर मात्र हुँदैन, निश्चित स्थानमा रोकिनु पनि त्यत्तिकै जरुरी छ । अगाडि र पछाडिको ब्रेक प्याड ठिक छ कि छैन, ब्रेक आयल चाहिने मात्रामा छ कि छैन ? ब्रेक टाइट गर्न मिल्छ कि मिल्दैन ? ब्रेक आयललाई डट फोर, डट फाइभ आदि भागमा डिपार्टमेन्ट अफ ट्रान्सपोर्टले विभाजन गरेको हुन्छ, त्यही अनुसारको ब्रेक आयल प्रयोग गर्नुपर्छ । ब्रेक लिभरको फ्रि प्ले कति छ ? यो २० देखि ३० एमएमको हुनुपर्छ र त्यही अनुसार उपयुक्त तरिकाले मिलाउनु पर्छ ।

त्यसैगरी बाइकमा चेनलाई पनि ठिक तरिकाले टाइट गरिएको हुनुपर्छ । स्ल्याप हुनु भएन । हेडलाइट, साइडलाइट आदि चलिरहेको छ कि छैन ? चेक गर्नुपर्छ । त्यसैगरी क्लच लिभरको फ्रि प्ले सामान्यतः १० देखि २० एमएम सम्म हुनुपर्छ । क्लच र ब्रेक थिच्दा यसको सन्तुलन मिलेको हुनुपर्छ ।

अर्को ध्यान दिनु पर्ने इन्जिन आयल हो । यो ताजा अवस्थामा हुनुपर्छ । यो वर्किङ कन्डिसनमा हुनुपर्छ । बाइकमा इन्जिन आयल, इन्धन वा ग्रिज आदि केही लिकेज भएको जस्तो लाग्छ भने चेक गर्नुपर्छ ।

बाइकको मिरर र हर्न पनि उपयुक्त अवस्थामा छन् कि छैनन् ? चेक गर्नुपर्छ । आजकाल वाटरकुल्ड इन्जिन भएका बाइक पनि उपलब्ध छन् । यस्ता बाइकमा रेडिएटर फ्यान चल्छ कि चल्दैन ? बाइक चलाएर केही समय राख्दा रेडिएटर हिट हुन्छ कि हुँदैन ? चेक गर्नुपर्छ । यदि हिट हुँदैन भने समस्या छ भन्ने बुझिन्छ ।

अन्तिममा बाइकको आवाज कस्तो छ ? त्यो पनि सुन्नुस् । लकडाउन पहिले बाइकको आवाज कस्तो थियो र अहिले कस्तो छ ? केही फरक छ कि ? फरक छ भने केही समस्या हुन सक्छ ।

यदि केही समस्या भएको अनुभव भयो र मर्मत गर्नुपर्ने आवश्यकता देखिन्छ भने विश्वासिलो सर्भिस सेन्टरमा एक पटक चेक गराउनु होला ।

अन्त्यमा, सुरक्षित तरिकाले बाइक वा स्कुटर जस्ता सवारी साधन चलाउनु होला । बाइक वा स्कुटर चलाउदा हेल्मेट र अन्य प्रोटेक्टिभ गियर लगाएर चलाउनु होला ।

• मनिष अर्याल
  सर्भिस म्यानेजर, इग्निसन अटो (हार्टफोर्ड नेपाल)