महिन्द्राको पहिलो इलेक्ट्रिक एसयूभीमा वढ्यो क्रेज, गाडी हात पार्न ७ महिनासम्म कुर्नुपर्ने

महिन्द्राको पहिलो इलेक्ट्रिक एसयूभी एक्सयूभी ४०० ले अहिले भारतीय बजारमा निकै राम्रो प्रतिक्रिया पाइरहेको छ । महिन्द्राले यो इलेक्ट्रिक एसयूभीको वुकिङ ५ दिनअघि मात्रै खुल्ला गरेको थियो । यो एसयूभी हालसम्म १० हजार वढी युनिट वुक भैसकेको छ भने वुकिङमा रुची राख्ने ग्राहकको संख्या हरेक दिन वढ्दो क्रममा रहेको छ ।

कम्पनीले यो एसयूभीको डेलिभरी मार्च महिनादेखी शुरु गर्ने वताएको छ । सवैभन्दा पहिले यसको टप स्पेक भेरिएन्टको डेलिभरी गरिने र त्यसपछि मात्र लोअर स्पेक हस्तान्तरण गरिने उसको भनाई छ । लन्च भएको पहिलो वर्षमा जम्मा २० हजार गाडीमात्र डेलिभरी गर्ने योजना कम्पनीले वनाएको छ । यस आधारमा हालकै वुकिङलाई आधार मान्दा पनि यो गाडी हात पार्न ग्राहकले कम्तीमा पनि ७ महिना कुर्नुपर्ने देखिन्छ ।

एक्सयूभी ४०० लाई महिन्द्राले दुई वटा व्याट्री प्याकमा उतारेको हो । यसमा जडान गरिएको ३४.५ किलोवाट आवरको सानो व्याट्री प्याकले ३७५ किलोमिटर र ३९.४ किलोवाट आवरको प्याकले ४५६ किलोमिटर रेन्ज प्रदान गर्ने दावी गरिएको छ । यी दुवै व्याट्री प्याकमा फ्रन्ट एक्सेल माउन्टेड इलेक्ट्रिक मोटर दिइएको छ । जसको अधिकतम पावर १५० एचपी र टर्क ३१० एनएम रहेको छ ।

यो एसयूभीलाई ५० किलोवाट डिसी चार्जरको साहयतामा ५० मिनेटभित्र सून्यदेखी ८० प्रतिशतसम्म चार्ज गर्न सकिन्छ भने ३.३ किलोवाट र ७.२ किलोवाट एसी चार्जरको समेत विकल्प दिइएको छ । यसको टप स्पेकमा ७ इन्चको टचस्क्रिन इन्फोटेन्मेन्ट सिस्टम उपलब्ध गराइएको छ भने अन्य फिचरमा सिंगल प्यानल सनरुफ, ओभर दि एयर अपडेट सहितको कनेक्टेड कार टेक्नोलोजी सहित ६ वटा एयर व्याग, चारवटै चक्कामा डिस्क वे्रेक र व्याट्री प्याकमा आइपी ६७ रेटिङ लगायत सेफ्टि फिचर पाउन सकिन्छ ।

भारतीय बजारमा यो एसयुभीको मूल्य १६ देखी १९ लाख भारुसम्म निर्धारण गरिएको छ । यो मूल्य शुरुवातमा वुकिङ लिने ५ हजार ग्राहकका लागी मात्र लागु हुने कम्पनीको भनाईले पछि यसको मूल्य बृद्धि हुने देखाएको छ । यो एसयूभीले बजारमा टाटा नेक्सन इभीसंग सिधा टक्कर गर्ने देखिएको छ ।

भारतीय बजारमा लन्च भएसंगै यो नयाँ एसयूभीलाई नेपाली इभी पारखीले समेत रुचीका साथ प्रतिक्षा गर्न थालेका छन् । भारतमै माग अत्याधिक भएका महिन्द्राका एसयुभीहरु एक्सयूभी ३०० र एक्सयूभी ७०० निकै ढिलो गरी नेपाल आएका र लन्च भएर पनि नेपाल आउन नसकिरहेको स्कर्पियो एनको नजिरले एक्सयूभी ४०० समेत नेपाल आउन लामै समय लाग्ने देखिएको छ । नेपाल आउँदा यसको शुरुवाती मूल्य ४० लाख हाराहारीवाट शुरु हुने अनुमान गर्न सकिन्छ ।