विश्वकै सबैभन्दा तीव्र गतिको इलेक्ट्रिक कार सार्वजनिक : ४ सेकेन्डमा २०० किमी प्रतिघण्टाको गति

हालै आयोजना भएको हैदराबाद ई–मोटर शोमा विश्वको सबैभन्दा तीव्र गतिको इलेक्ट्रिक कार सार्वजनिक भएको छ । यसको नाम ‘बाटिस्टा’ हो । यसको डिजाइन पिनिनफरिनाले गरेको हो ।

बाटिस्टाको डिजाइन आकर्षक हुनुका साथै इटालीमा बनेको सबैभन्दा शक्तिशाली कार पनि हो । साथै, यो आधिकारिक रूपमा संसारको सबैभन्दा टप स्पिड इलेक्ट्रिक कार पनि बनेको छ ।

पिनिनफरिना महिन्द्रा समूहको इटालियन लक्जरी कार ब्रान्ड हो । बाटिस्टाको मूल्य करिव ३० करोड रुपैयाँ राखिएको छ । यसले १.८६ सेकेन्डमा ०–१०० किमी प्रतिघण्टा र ४.७५ सेकेन्डमा ०–२०० किमी प्रति घण्टाको गति लिन सक्छ । बाटिस्टाले मात्र ३१ मिटरमा १०० किलोमिटर प्रतिघण्टाबाट ० सम्मको गति घटाउन सक्छ ।

सो इलेक्ट्रिक कारको टप स्पिड ३५० किमी प्रतिघण्टा छ । यसको ब्याट्रीमा १२० केडब्ल्युएचको क्षमता छ र यसमा ६९६० लिथियम–आयोन सेल छ । यसको तौल लगभग २ टन छ । यसको ड्राइभिङ रेन्ज ४८२ किलोमिटर छ ।