बनभोजमा रमाए अटो मेकानिक्स

काठमाडौं – नेपाल अटो मेकानिक्स व्यवसायी संघको आयोजनामा बनभोज कार्यक्रम सम्पन्न भएको छ । शनिबार काठमाडौंको थानकोटस्थित त्रिभुवन पार्कमा सो कार्यक्रम सम्पन्न भएको हो ।

सो अवसरमा काठमाडौं उपत्यकाका १ सय हाराहारीको संख्यामा रहेका चार पांग्रे सवारी साधनका मेकानिक्स तथा यस पेशा व्यवसायमा संलग्नहरुको सहभागिता रहेको थियो ।

सो अवसरमा बिंगो, घैटो फोर, बेलुन फुक्ने लगायतका विभिन्न प्रतियोगिता आयोजना गरिएको थियो ।

नेपाल अटो मेकानिक्स व्यवसायी संघका अध्यक्ष दीपेन्द्र बुढाथोकी, निवर्तमान अध्यक्ष ठाकुरप्रसाद न्यौपाने, पूर्व अध्यक्ष महेश बज्राचार्य र विभिन्न बरिष्ठ मेकानिक्स व्यवसायीहरुले सो अवसरमा कार्यक्रमलाई मनोरञ्जनात्मक बनाउन भूमिका खेलेका थिए ।

संघले प्रत्येक वर्ष बनभोज र अन्य विभिन्न कार्यक्रम गर्दै आइरहेको छ ।