चिनियाँ कम्पनी जोङसेनसँग मिलेर पियाजियोले बनाउदै छ नयाँ १५० सीसीको इन्जिन

पियाजियोले आफ्नो आगामी स्कुटरको लागि नयाँ इन्जिन तयार गर्दैछ । जानकारी अनुसार कम्पनीले १५० सीसी इन्जिनमा काम गरिरहेको छ । यो नयाँ इन्जिन विकास गर्न कम्पनीले चिनियाँ मोटरसाइकल निर्माता कम्पनी जोङसेनसँग सहकार्य गरेको छ । एक रिपोर्ट अनुसार दुवै कम्पनीले एसियाली र युरोपेली बजारका लागि यो इन्जिन विकास गरेका हुन् ।

यो नयाँ १५० सीसी लिक्विड–कुल्ड इन्जिनलाई ’जी१५०एस’ भनिनेछ र यसले अधिकतम १५ बीएचपीको पावर र १५ एनएमको टर्क जेनेरेट गर्छ । जी१५०एसमा पनि स्टार्ट–स्टप सिस्टम, कीलेस इग्निशन र साइलेन्ट स्टार्ट सिस्टम दिइएको छ । सो इन्जिन नयाँ स्कुटर मोडलसँगै २०२२ मा लन्च हुने अपेक्षा गरिएको छ । यो इन्जिनको प्रयोगले कम्पनीका स्कुटरको मूल्य समेत बढ्ने अपेक्षा गरिएको छ ।

पियाजियोले आफ्नो बारामती प्लान्टमा ऐप इलेक्ट्रिक थ्री–ह्वीलर्सको रेन्ज एसेम्बल गर्न अल–वुमन वर्कफोर्स सुरुवात गरेको छ । बारामती र वरपरका विभिन्न प्राविधिक प्रतिष्ठानबाट महिला कर्मचारी खटाइएको छ । महिलाहरूलाई एसेम्बली लाइनमा आउनुअघि सुरक्षा प्रक्रिया, उपकरणको प्रयोग, इलेक्ट्रिक सवारी र बीएमएस, मोटर, ई–बक्सलगायतका विषयमा पनि तालिम दिइन्छ ।

पियाजियोको बारामती प्लान्टमा महिला कार्यबलले ऐपको इलेक्ट्रिक मोडेल ऐप ई–सिटि र ऐप ई–एक्स्ट्रा एसेम्बल गर्छ । ऐप इलेक्ट्रिक एसेम्बली लाइनमा काम गर्ने महिलाहरू गुणस्तर नियन्त्रण जाँच, फिटिङ, एसेम्बली, इलेक्ट्रिकल र समग्र सामग्री व्यवस्थापनको लागि जिम्मेवार हुनेछन् ।

पियाजियोले भारतमा आफ्ना दुई पाङग्रे र तीन पाङग्रे सवारी साधनको पहुँच विस्तार गर्दैछ । कम्पनीले भारमा ७२५ डिलरशिप र ११०० कस्टमर टचप्वाइन्ट सञ्चालन गर्दैछ । कम्पनीले हाल भारतमा अप्रिलिया, भेस्पा र ऐप जस्ता ब्रान्ड बिक्री गर्दै आइरहेको छ ।

पियाजियोले चाँडै नै आफ्नो पहिलो इलेक्ट्रिक स्कुटर पियाजियो वान अन्तर्राष्ट्रिय बजारमा लन्च गर्दैछ । सो पियाजियो कम्प्याक्ट इलेक्ट्रिक स्कुटर हुनेछ तर राइडरमा कम्फर्ट दिन ठूलो फुटरेस्ट हुनेछ ।

पियाजियो इलेक्ट्रिक स्कुटर दुई भेरिएन्ट वान र एक्टिभमा लन्च हुनेछ । एक्टिभ भेरिएन्टमा वान भन्दा धेरै रेन्ज र स्पिड दिन सकिन्छ । पियाजियो वानमा १.२ केडब्ल्युएच क्षमताको लिथियम आयोन ब्याट्री दिइएको छ । यसको इलेक्ट्रिक मोटरले १.६ बीएचपी पावर जेनेरेट गर्छ । स्कुटरले ४३ किमी÷घन्टाको टप स्पिड दिन्छ र फुल चार्जमा ५५ देखि ६० किलोमिटरको ड्राइभ रेन्ज प्रदान गर्नेछ ।

नेपाली बजारमा पियाजियो कम्पनीको भेस्पा स्कुटर बिक्रीका लागि उपलब्ध भइरहेको छ भने जोङसेन ब्रान्ड पनि भर्खरै भित्रिएको छ ।