यातायात मन्त्रिकै गाडीलाई जरिवाना !

भौतिक पूर्वाधार तथा यातायातमन्त्री मोहम्मत इश्तियाक राईको गाडीलाई ट्राफिक प्रहरीले जरिबाना तिराएको छ । आज बिहान ललितपुरको जावलाखेलस्थित निषेधित क्षेत्रमा पार्किङ गरिएको अवस्थामा जरिबाना तिराएको हो ।

महानगरीय ट्राफिक प्रहरी महाशाखाका सहायक प्रवक्ता प्रहरी नायव उपरिक्षक बाल नरसिंह राणाका अनुसार बा २२ च २५८३ नम्बरको निजी गाडीलाई एक हजार रुपैयाँ जरिबाना तिराइएको हो ।

पार्किङ निषेधित क्षेत्रमा पार्क गर्ने सवारीलाई जरिबाना तिराउँदै आएको उनले बताए ।गाडीमा संघीय संसद् सचिवालयले सांसद राइलाई संसद् भवन प्रवेश गर्न दिएको पत्रसमेत टाँस गरिएको थियो । सो गाडी मन्त्रीले निजी काममा प्रयोग गर्दै आएको बताइएको छ ।