सुन्दर अटो इन्जिनियरिङले लन्च ग-यो आफै डिजाइन गरेको इलेक्ट्रिक बाइक

सुन्दर अटो इन्जिनियरिङले आफ्नै प्राविधिकद्वारा आफ्नै डिजाइन र च्यासिस निर्माण गरिएको इलेक्ट्रिक बाइक लन्च गरेको छ । एक कार्यक्रमका बीच ऊर्जा, जलस्रोत तथा सिचाइमन्त्री शक्ति बहादुर बस्नेतको प्रमुख आथित्यतामा सो बाइक लन्च गरियो ।

गन्तव्य ईभी १००–एस नाम दिइएको सो बाइक फुल चार्ज गर्दा १२० किलोमिटर गुड्ने सुन्दर ग्रुपका अध्यक्ष भेष बहादुर थापाले जानकारी दिए । यसको मूल्य २ लाख ५० हजार रुपैयाँ तोकिएको छ । आजबाट एक महिनाभित्र खरिद गर्ने ग्राहकले दुई लाख ४० हजार रुपैयाँमै बाइक प्राप्त गर्न सक्ने अफर रहेको कम्पनीले जनाएको छ । 

१५ सय वाटको मोटर रहेको मोटरसाइकलमा ४८ भोल्टको कन्ट्रोलरह रहेको छ । बाइक चार्ज गर्न १० एम्पियरको अटोमेटिक एसएमपीएस चार्जर रहेको छ ।

सुन्दर ग्रुपद्वारा संचालित सुन्दर इन्जिनियरिङ र सुन्दर यातयातले यो भन्दा पहिले काठमाडौं उपत्यकामा विद्युतीय बस संचालन गर्नुका साथै इलेक्ट्रिक स्कुटर समेत उपलब्ध गराइरहेका छन् ।

सुन्दर ग्रुपले पेट्रोलियम पदार्थबाट चल्ने मोटरसाइकललाई विद्युतीयमा रुपान्तरण गर्ने कार्य पनि गरिरहेको छ ।