९९ किलोवाटको ओरा ०३ को बुकिङ यसै साता देखि खुल्ने, कति पर्ला मूल्य ?

काठमाडौं – नेपाली बजारमा गत वर्ष देखि परीक्षणका लागि उपलब्ध ग्रेटवाल मोटर्सको इलेक्ट्रिक कार ओरा गुड क्याट अब ओरा ०३ को नाममा आउने भएको छ । नेपालका लागि आधिकारिक वितरक भीजी इम्पेक्सले सो कारको बुकिङ यसै साता देखि शुरु हुने बताएको छ ।

बजेट भन्दा पहिले नै यसको बुकिङका लागि तयारी थालेको भीजी इम्पेक्सले अन्य आवश्यक तयारी भइरहेको बताएको छ । बजेटले यो सेगमेन्टका सवारी साधनको कर बढाएका कारण पहिले अनुमान गरिए भन्दा यसको मूल्य पनि केही बढी हुनेछ । यद्यपि कम्पनीले अझै यसको मूल्य भने सार्वजनिक गरिसकेको छैन ।

ओरा ०३ नेपाली बजारमा ४८ लाख देखि ४८ लाख ५० हजार रुपैयाँ हाराहारी मूल्यका साथ बुकिङ खुला हुने अनुमान गरिएको छ ।

थाइल्यान्डमा गुड क्याट, अष्ट्रेलियामा ओरा र युरोपमा फंकी क्याट आदि नामबाट चिनिने यो गाडीको ग्लोबल नेम भने ओरा ०३ हो । यस आधारमा अब ग्लोबल नेमकै आधारमा सो गाडी नेपाल आउने कम्पनी स्रोतको भनाइ छ ।

सो गाडी टेक ४०१, अल्ट्रा ४०१ र अल्ट्रा ५०१ गरी तीन भेरिएन्टमा यो इलेक्ट्रिक कार उपलब्ध छ । सबैभन्दा तल्लो भेरिएन्ट टेक ४०१ को तुलनामा अन्य दुई भेरिएन्टमा धेरै फिचर उपलब्ध छन् ।

पहिले सबै भेरिएन्टमा १०५ किलोवाटको मोटर थियो भने बुट क्षमता २२८ लिटर । त्यसैगरी ग्राउन्ड क्लियरेन्स १४५ एमएम छ । अघिल्लो दुई भेरिएन्टमा ४८ किलोवाट आवर र माथिल्लो अल्ट्रा ५०१ भेरिएन्टमा ६३ किलोवाट आवरको ब्याट्री छ । दुई भेरिएन्टले ४५० किलोमिटर र माथिल्लो भेरिएन्टले ५०० किलोमिटर रेन्ज दिने कम्पनीको भनाइ छ । तीनै भेरिएन्टल १०५ किलोवाट पावर र २१० एनएम टर्क जेनेरेट गर्छ ।

तर अब नेपालमा उपलब्ध हुने ओरा ०३ मा ९९ किलोवाटको मोटर हुनेछ । नेपालमा हाल १०० किलोवाट भन्दा कम क्षमताको मोटर भएको गाडीमा भन्सार शुल्क कम लाग्ने भएकाले धेरै कम्पनीहरुले त्यही अनुसार मोटर विकास गरिरहेका छन् ।

कम्पनी स्रोतका अनुसार नेपाली बजारमा माथिल्लो भेरिएन्ट भने उपलब्ध हुने छैन । नेपाली ग्राहकको मागलाई मध्यनजर गरी ४०० किलोमिटर हाराहारी रेन्ज दिने गाडी नै उपलब्ध गराइने छ ।