निसान म्याग्नाइट १ लाख युनिट बिक्री, निसान वान प्लेटफर्म लन्च

जापानी कार निर्माता कम्पनी निसानले म्याग्नाइट एसयूभीले भारतमा लन्च भएदेखि हालसम्म १ लाख युनिट बिक्री भइसकेको दाबी गरेको छ । निसान म्याग्नाइट एसयूभी भारतमा सन् २०२० मा ४ लाख ९९ हजार भारु मूल्यमा लन्च गरिएको थियो ।

म्याग्नाइट एसयूभीले भारतीय बजारमा मारुती सुजुकी ब्रेजा, हुन्डाई भेन्यु, किया सोनेट र टाटा नेक्सनसँग प्रतिस्पर्धा गर्छ । हाल, निसानको म्याग्नाइट एसयूभी मात्र भारतीय बजारमा उपलब्ध छ । साथै निसान म्याग्नाइट एसयूभी विदेशी बजारमा पनि निर्यात हुने गरेको छ ।

निसान इन्डियाले आफ्नो निसान वान प्लेटफर्म लन्च गर्ने पनि घोषणा गरेको छ । निसान वान नयाँ वेबमा आधारित वान–स्टप प्लेटफर्मको रूपमा आएको दाबी गरिएको छ । यसको मद्दतले ग्राहकहरु टेस्ट ड्राइभको साथ कार बुक गर्न पनि सक्छन् ।

नेपाली बजारमा पनि निसान म्याग्नाइट निकै नै रुचाइएको कार हो । नेपाली बजारमा कुनै समयमा कम्पनीले माग अनुसार उपलब्ध गराउन सकेको थिएन । हाल निसान म्याग्नाइटको नेपाली बजारमा सुरुवाती मूल्य ३३ लाख ९९ हजार रुपैयाँ छ ।