१६० सिसीको एकमात्र स्कुटर अप्रिलिया एसएक्सआर, यस्तो छ मूल्य र फिचर्स

पछिल्लो समय नेपाली बजारमा उच्च सिसी क्षमताका स्कुटरको आयात हुने क्रम बढिरहेको छ । स्कुटर सेग्मेन्टमा १२५ सिसी माथीलाई उच्च सिसी मान्ने गरिन्छ ।

बजारमा अहिले भेस्पा, अप्रिलिया र यामाहासंग मात्र १५० सिसी वा सो माथीका स्कुटर उपलब्ध छन् । जसमध्ये १६० सिसी सेग्मेन्टमा उपलब्ध एकमात्र स्कुटर अप्रिलिया एसएक्सआर पवारफुल स्कुटर चाहने राइडरमाझ लोकप्रिय बनिरहेको छ । यो स्कुटरको सिधा प्रतिस्पर्धा यामाहा एन म्याक्स १५५ संग भैरहेको छ ।

अप्रिलियाको यो स्कुटरमा १०६.३ सिसी क्षमताको सिंगल सिलिन्डर, थ्री भल्भ, ४ स्ट्रोक, एसओएचसी, एफआई इन्जिन जडान गरिएको छ । जुन बिएस ६ मापदन्डको हो । यो स्कुटरको अधिकतम पावर ११ पिएस र टर्क पनि ११ एनएम नै रहेको छ । म्याक्सी लुक्समा आधारित यसको स्टायल र एरोडाइनामिक डिजाइनका कारण यो स्कुटर निकै स्पोर्टी देखिन्छ ।

यो स्कुटरमा कम्पनीले तीन कोटको एचडी फिनिसिङ पेन्ट लगाएको छ । एलइडी डिआरएलएस सहितको ट्विन एलइडी क्रिस्टल हेडल्याम्पले यसको फ्रन्ट लुक्समा निखार दिएको छ । कालो रङको ठूलो विन्डस्क्रिन, मोबाइल कनेक्टीभिटी सहितको पूर्णत डिजिटल मिटर र ५ स्पोक अलोई ह्विल्स सहितको १२ इन्च ह्विल्स दिइएको यो स्कुटरको अगाडी चक्कामा डिस्क र पछाडी ड्रम ब्रेक जडान गरिएको छ । सेफ्टि फिचर्समा समेत अब्बल साबित गर्न यसमा सिंगल च्यानल एबिएस पनि दिइएको छ ।

वुट लाइट सहितको २१ लिटर अन्डर सिट स्टोरेज क्षमता रहेको यसको सिटमुनी स्टोरेज कम्पार्टमेन्टसंगै यूएसबी चार्जिङ पोर्ट समेत उपलब्ध गराइएको छ । यो स्कुटरमा अप्रिलियाले आरामदायी सिट र ठूलो आकारको एक्जस्ट पाइप दिएको छ । ७ लिटर इन्धन अट्ने ट्यांक जडान गरिएको यो स्कुटरलाई राइडरले अधिकतम १ सय किलोमिटर प्रतिघन्टाको गतिमा हाँक्न सक्नेछन् । यो स्कुटरले प्रति लिटर इन्धन खपतमा ४० किलोमिटर माइलेज दिने दाबी गरिएको छ ।

१६० एमएम ग्राउन्ड क्लिरियन्स भएको एसएक्सआर १६० को अगाडी टेलिस्कोपिक फर्क सस्पेन्सन र पछाडी एड्जस्ट गर्न मिल्ने मोनोशक सस्पेन्सन जडान गरिएको छ । यो स्कुटरको मूल्य नेपाली बजारमा ४ लाख ३५ हजार रुपैयाँ निर्धारण गरिएको छ ।