ओमोडा ५ ईभी लाइभ स्ट्रिममार्फत सार्बजनिक

काठमाडौं– चेरी इन्टरनेशनलले नेपालमा आफ्नो फ्ल्यागशिप भेरियन्ट ओमोडा ५ ईभी, लन्च गर्ने तयारी थालेको छ । सोबारे जानकारी दिन ओमोडा को चिनियाँ टोलीले अक्टोबर ९ मा एक अनलाइन लाइभ स्ट्रिम कार्यक्रम गरेको थियो ।

ओमोडाका सीएमओ लिलियन जिओंग र प्रबन्ध निर्देशक कायपान द्वारा संचालित सो लाइभ स्ट्रिम चिनबाट भएको थियो । जसमा नेपालका लागि आधिकारिक वितरक शारदा समूहका प्रतिनिधी र संचारकर्मीहरु अनलाइन लाइभ स्ट्रिममा सहभागी भएका थिए । कार्यक्रममा चेरी इन्टरनेशनलले विश्वभरका उद्योगमा महत्त्वपूर्ण प्रगति गरेको जानकारी गराइएको थियो ।

कम्पनीले छिट्टै बजारमा ल्याउने तयारी गरेको ओमोडा ५ को बाहिरी भागमा स्पोर्टी ‘एक्स’ आकारको फ्रन्ट फेस दिइएको छ, जुन हावा प्रतिरोधका लागि अनुकूल र सही सन्तुलन कायम राख्न गतिशील रहेको छ ।

ओमोडा ५ ईभीको मुख्य विशेषताहरू मध्ये यसमा स्मार्ट र हलुका ब्याट्री रहेको छ । जसले ब्याट्रीको आयु बढाउनुको साथै भेहिकल टु लोड प्रविधि मार्फत माइलेजको चिन्तालाई सम्बोधन गर्न मद्धत गर्ने जनाइएको छ ।

यसमा दिइएको ८१५५ क्वालकम स्मार्ट चिप, १६ प्रकारका एडीएएस, सोनी स्पिकर, असिस्टेड ड्राइभिङ जस्ता फिचरले ईभी पारखीलाई आकर्षित गर्ने विश्वास लिइएको छ । यो नयाँ ईभी ६१ किलोवाट आवर र ४० किलोवाट आवरको ब्याट्री प्याकमा उपलब्ध हुने कम्पनीले जानकारी गराएको छ । यसको रेन्ज ४५० किलोमिटर दावी गरिएको छ ।