नेपाल भित्रियो ओमोडा ई५ लङ रेन्ज ईभी, अर्को साता लन्च हुने, मूल्य ५९ लाख ४९ हजार

काठमाडौं – नेपाली बजारमा उपलब्ध हुने भनेर केही समय देखि चर्चामा रहेको ओमोडा ई५ इलेक्ट्रिक एसयूभी वीरगन्ज भन्सार हुँदै नेपाल प्रवेश गरेको छ । नेपालका लागि चेरीको आधिकारिक वितरक एसपीजी अटोमोबाइल्सले सो गाडी भित्र्याएको हो ।

कम्पनी स्रोतका अनुसार सो गाडी आगामी साता नेपाली बजारमा औपचारिक रुपमा लन्च हुनेछ । यसको मूल्य ५९ लाख ४९ हजार रुपैयाँ हुने बताइएको छ ।

ओमोडा ई५ लङ रेन्ज भर्सन नेपाली बजारमा उपलब्ध हुने भएको हो । यसमा ६१ किलोवाट आवर ब्याट्री क्षमता, ९९ किलोवाट मोटर पावरको मोटर हुनेछ, जसले सिंगल चार्जमा ४३० किलोमिटर रेन्ज दिनेछ ।

यो नेपाली बजारमा उपलब्ध हुने सबैभन्दा सुरक्षित ईभी हुने कम्पनीको दावी छ । यसमा २.५ एडास सेफ्टी फिचर उपलब्ध हुनेछ । १८० एमएम ग्राउन्ड क्लियरेन्स भएको सो इलेक्ट्रिक एसयूभीले फाइभ स्टार सेफ्टी रेटिङ प्राप्त गरेको छ ।

एसयूभीको एक्स्टेरियर डिजाइन ‘लाइट अफ मुभमेन्ट’ नामक आधुनिक डिजाइन–दर्शनमा आधारित रहेको कम्पनीले जनाएको छ । एक्सटेरियर फिचर अन्तर्गत यसमा एक्स आकारको फ्रन्ट फेस, डायनामिक फास्टब्याक आकार, स्ट्यागर्ड–मेट्रिक्स–टेललाइट र टी आकारको डेटाइम–रनिङ–हेडलाइट पाउन सकिन्छ ।

ओमोडा ई५ को इन्टेरियरमा २४.६ इन्चको डुअल स्क्रिन, २५६ रङको एम्बियन्ट लाइट, प्रिमियम ८ सोनी स्पिकरसहितको क्रोम डोर ह्याण्डल, विद्युतीय सनरुफ, ५० किलोवाटको वायरलेस चार्जर, भेन्टिलेटेड सिटहरू रहनेछन् ।

यसमा ब्लाइन्ड स्पट डिटेक्सन, लेन चेन्ज असिस्ट डिपार्चर रिमाइन्डर, एडप्टिभ क्रुज कन्ट्रोल, फ्रन्ट कोलिजन वार्निङ, लेन किपिङ असिस्ट, ट्राफिक जाम अभोइडेन्स असिस्टेन्ट, ६ वटाएयरब्याग लगायत १७ भन्दा बढी प्रकारका एडास फिचर दिइएको छ ।

यसमा ८ वर्ष वा १ लाख ६० हजार किलोमिटर गुड्दा सम्मको ब्याट्री वारेन्टी उपलब्ध हुनेछ ।