असोज पहिलो साता ओमेगा सेइकी मोविलिटीका इलेक्ट्रिक साधन नेपाल आउने

इलेक्ट्रिक भेइकल व्रान्ड ओमेगा सेइकीका टु ह्विलर, थ्रि ह्विलर र फोर ह्विलर साधन नेपाली बजारमा उपलब्ध हुने भएका छन् । फोटोन गाडीको नेपालका लागि आधिकारिक वितरक समेत रहँदै आएको एमएडब्लु वृद्धि कमर्सियल भेइकल प्रालिले यी सवारी साधनलाई नेपाल भित्र्याउन लागेको हो । असोज पहिलो साता यी साधन नेपाली बजारमा औपचारिक लन्च हुने कम्पनी स्रोतले बताएको छ ।

यी तीन सेग्मेन्टका सवारी साधनमध्ये इलेक्ट्रि टु ह्विलर भने उत्पादनकै क्रममा रहेका कारण भारतीय बजारमा लन्च भए पश्चात नेपाल आउने बताइएको छ । वाँकी तीन पाङ्ग्रे र चार पाङ्ग्रे इभी भने तत्कालै नेपाल आउनेछन् ।

तीन पाङ्ग्रेमा यो व्रान्डसंग रेज प्लस, रेज प्लस स्वाप, रेज प्लस -यापिड, रेज प्लस फ्रोस्ट लगायतका मोडल उपलब्ध छन् । तीन पांग्रे सवारीका क्षेत्रमा यो भारतको दोस्रो ठूलो कम्पनी भएको दावी गरिएको छ । यसैगरी फोर ह्विलरमा एम१केए मिनी ट्रक उपलब्ध छ । टु ह्विलरमा भने फेरी र जोरो मोडलमा इलेक्ट्रिक स्कुटर आउने तयारीमा छन् ।

एंग्लियन ओमेगा ग्रुप अन्तर्गत स्थापित ओमेगा सेइकी मोबिलिटीले यी सवारी साधन उत्पादन गर्छ । यो ग्रुपले इलेक्ट्रिक मोबिलिटी वाहेक हाई टेक अटो कम्पोनेन्ट्स, इन्फ्रास्ट्रक्चर्स, सप्लाई चेन म्यानेजमेन्ट सर्भिसेज, ट्रेडिङ र स्पोट्र्सको क्षेत्रमा समेत कारोबार गरिरहेको छ । यो व्रान्डको नेटवर्क भारत वाहेक युएई, स्विट्जरल्यान्ड, थाइल्यान्ड, जापान र हङकङमा समेत विस्तार भैसकेको छ ।