यस्तो हुनेछ ओलाको इलेक्ट्रिक कार, टिजर सार्वजनिक

भारतमा राइड सेयरिङ सर्भिसमार्फत चर्चामा आएको ओलाले आगामी दिनमा इलेक्ट्रिक कार समेत ल्याउने संकेत गरेको छ । ओलाका सीईओ भावेश अग्रवालले सोसल मिडिया ट्विटरमा ओलाको आगामी दिनमा बजारमा आउने इलेक्ट्रिक कारको टिजर सार्वजनिक गरेका छन् ।

उक्त इलेक्ट्रिक कार ओला ई–कारको एक डिजाइन कन्सेप्ट जस्तो देखिन्छ, जुन स्टाइलिस ब्याट्री–इलेक्ट्रिक ह्याचब्याक कार हुनेछ । ओलाले केही समय पहिले देखि इलेक्ट्रिक स्कुटर समेत बजारमा ल्याएको छ । अब यसले कार समेत ल्याउने संकेत गरेको छ ।

ओलाले हालै भारतीय बजारमा ल्याएको ओला एस१ र एस१ प्रो इलेक्ट्रिक स्कुटर लोकप्रिय बनिरहेका छन् । ओलाका सीईओले पहिले पनि आगामी सन् २०२३ सम्ममा इलेक्ट्रिक कार बजारमा ल्याउने संकेत गरेका थिए । मिडिया रिपोर्टका अनुसार कम्पनीका अधिकारीहरुले यो त्यसैको टिजर भएको समेत बताएका छन् ।

भावेश अग्रवालले यो भन्दा पहिले पनि जापानको सफ्टबैंक ग्रुपको सहयोगमा इलेक्ट्रिक कार ल्याउने संकेत गरेका थिए ।