निषेधाज्ञा : अब सवारी साधनमा जोर विजोर वा अन्तिम अंक आधार

काठमाडौं– पछिल्लो पटक थपिएको निषेधाज्ञा सोमबार रातिदेखि समाप्त हुँदैछ ।

त्यसपछि पनि थप एक साताका लागि निषेधाज्ञा थप्ने तयारी भैरहेको छ ।

यद्यपि, काठमाडौं उपत्यकामा जारी निषेधाज्ञा थप एक साता लम्ब्याउँदै विभिन्न पेशा, व्यावसाय चलाउन दिने विषयमा छलफल भएको छ ।

काठमाडौं उपत्यकाका तीन जिल्लाका प्रमुख जिल्ला अधिकारीहरुले जारी निषेधाज्ञा सात देखि दश दिनसम्म थप्ने विषयमा छलफल गरेका छन् ।

अबको थप निषेधाज्ञामा फेन्सी, भाँडाकुँडालगायत भीडभाड नहुने व्यवसाय चलाउन दिने तयारी भएको जिल्ला प्रशासन कार्यालय ललितपुरका प्रमुख जिल्ला अधिकारी ढुण्डीप्रसाद निरौलाले बताए । किराना पसल, डिपार्टमेन्टल स्टोर, तरकारी, फलफूल, दूध, मासु र ग्यासका पसल बिहान ११ बजेसम्म खोल्न दिइएको छ ।

निजी सवारी साधनलाई जोर विजोर प्रणालीमा चलाउन दिने विषयमा पनि छलफल भएको छ । सार्वजनिक सवारी साधन भने अबको थप निषेधाज्ञामा पनि चल्न पाउने छैनन् । यसैगरी यातायात तथा सवारी साधन संचालनका विषयमा यसअघि गरिएको जोरविजोरको मोडालिटीमा भन्दा अन्तिम अंकलाई आधार मानेर सोही अंकसँग मिल्दो बारका आधारमा सञ्चालन गर्न दिने विषयमा छलफल भइरहेको छ । यसो गर्दा एकैपटक सडकमा भीडभाड कम हुने आँकलन सरोकारवाला निकाय र स्थानीय प्रशासनको छ ।

आज बस्ने वैठकले यस विषयमा निर्णय गर्ने छ । सवारी साधन मर्मतका लागि वर्कशपहरु स्वास्थ्यका मापदण्ड अपनाएर खोल्न दिइएको छ ।

निजी तथा सार्वजनिक निर्माणको क्षेत्रमा काम गर्न यसअघि नै खुला गरिएको छ ।