पेट्रोलियम पदार्थ बेच्ने आयल निगमले नै किन्यो विद्युतीय कार

काठमाडौं – नेपालमा पेट्रोलियम पदार्थको कारोबार गरिरहेको नेपाल आयल निगमले ३ वटा विद्युतीय कार किनेको छ । निगमले बीवाईडी ई६ इलेक्ट्रिक कार खरिद गरेको हो ।

निगमले केही समय पहिले ३ वटा विद्युतीय कार उपलब्ध गराउनका लागि बोलपत्र आह्वान गरेको थियो । सो अनुसार सबैभन्दा कम मूल्य कबोल गरिएको बीवाईडीको कार खरिद गरिएको बताइएको छ ।

नेपालमा बीवाईडीका कार बिक्री–वितरण गरिरहेको साइमेक्स इंकले ती कार निगमलाई हस्तान्तरण गरेको छ ।

निगमले महँगो पेट्रोलियम पदार्थको खपत घटाउने लक्ष्यसहित विद्युतीय सवारी किनेको हो । निगमले महँगो मूल्यमा खरिद गरेर ल्याएको पेट्रोलियम पदार्थको खपत घटाउने योजना चालू आर्थिक वर्षको बजेटमै समेटिएको छ ।

बीवाईडीको सो इलेक्ट्रिक कारको मूल्य ५९ लाख रुपैयाँ छ ।

यो नेपाली बजारमा उपलब्ध सबैभन्दा धेरै रेन्ज दिने इलेक्ट्रिक कार भएको कम्पनीको दावी छ, जसले सिंगल चार्जमा ५२२ किलोमिटर रेन्ज दिन्छ ।

यो गाडीमा ७१.७ किलोवाट आवरको ब्लेड ब्याट्री प्रयोग गरिएको छ भने ७० किलोवाटको मोटर छ । नयाँ डिजाइन, नयाँ इन्टेरियर, नयाँ इन्फोटेनेमन्ट सिस्टम, नयाँ ब्लेड ब्याट्री र प्रशस्तै बुट स्पेस यो कारका प्रमुख विशेषता हुन् ।