दशैंमा बिक्री गर्न महिन्द्रासंग छैन स्कर्पियो, एक्सयुभी ३०० र ५००

नेपाली बजारमा महिन्द्रा गाडीको अभाव देखिएको छ । सेमी कन्डक्टर अभावका कारण भारतमा उत्पादन कटौती गरेको महिन्द्राले माग बमोजिम अपूर्ती गर्न नसकेका कारण नेपालमा समेत असर देखिएको हो । आयतकर्ता कम्पनी अग्नी इन्कर्पोरेटेड स्रोतका अनुसार अहिले कम्पनीसंग स्कर्पियो, एक्सयूभी ३०० र एक्सयुभी ५०० को कुनैपनि युनिट स्टकमा उपलब्ध छैन । यद्यपी महिन्द्राका पिकअपहरु भने सहज अबस्थामै रहेकोे उक्त स्रोतले बताएको छ ।

सवारीसानको माग उच्च हुने सिजनमै अभाव झेल्नुपरेपछि अहिले कम्पनीले नयाँ लट आएपछिमात्र डेलिभरी दिन सक्ने भन्दै बुकिङ लिइरहेको छ । नेपाली बजारमा महिन्द्राका स्कर्पियो, एक्सयुभी ३०० र एक्सयुभी ५०० सबैभन्दा बढी रुचाइएका मोडल हुन् । अझ दशैं/तिहारमा लामो यात्रा गर्न चाहनेहरुले बढीमात्रामा स्कर्पियो खोज्ने हुँदा यो गाडीको माग उच्च हुनेगर्छ ।

भारतीय बजारमा नयाँ थार लन्च भएको लामो समय बितिसक्दा समेत कम्पनीले यो गाडीलाई नेपाल भित्राउन सकिरहेको छैन । भारतमै माग उच्च रहेको र माग बमोजिम उत्पादन हुन नसकेका कारण यो एसयुभी नेपाल भित्रिने समय अझै लम्विन सक्ने देखिन्छ ।