विभागले लाइसेन्सका लागि ल्याएको ६ लाख स्मार्ट कार्डमा प्रिन्ट नै नहुने समस्या, अब के होला ?

काठमाडौं – यातायात व्यवस्था विभागले केही दिन पहिले नेपालमा आइपुगेको भनिएको ६ लाख थान स्मार्ट कार्डमा प्रिन्ट नै नहुने समस्या देखिएको छ ।

स्मार्ट कार्ड छाप्न गत फागुनमा सरकार र जर्मनी कम्पनी मुहेल्बर आइडी सेवा जिएमबिएचसँग सम्झौता भएको थियो। कम्पनीले १४ लाख ९८ हजार ८० डलरमा १२ लाख कार्ड छाप्ने ठेक्का पाएको हो।

पहिलो चरणमा कम्पनीले ६ लाख कार्ड हवाई कार्गो गरेर पठाएको हो। बाँकी ६ लाख दोस्रो चरणमा ४५ दिनपछि नेपाल आइपुग्ने विभागले बताएको थियो ।

तर यी कार्डमा लाइसेन्स छाप्न नमिले पछि विभागले परीक्षणका लागि भारत पठाएकोमा पहिले भनिएको भन्दा फरक स्पेसिफिकेसन भएकाले छाप्न नमिलेको पाइएको छ । पहिले परीक्षणका लागि उपलब्ध कार्डमा भने छाप्न मिल्ने व्यवस्था थियो ।

भारतीय कम्पनी मद्रास सेक्युरिटी प्रिन्टर्सले भने सो कार्डमा छाप्नका लागि आवश्यक पर्सनलाइज्ड कार्य गर्न र छाप्न ४० हजार डलर अर्थात करिव ५४ लाख रुपैयाँ लाग्ने जनाएको छ ।

यो अवस्थामा यातायात व्यवस्था विभागले जर्मन कम्पनीलाई यस वारेमा जानकारी दिइसकेको छ । तर उत्तर आएको छैन ।

कार्डका लागि आवश्यक भुक्तानी उपलब्ध गराउने भने बाँकी नै छ । यो अवस्थामा आगामी दिनमा मन्त्रालयसँग समेत थप समन्वय गरेर अगाडि बढ्ने विभागको भनाइ छ ।