बिक्री शून्य भएपछि कम्पनीले वेबसाइटबाट हटायो यो एसयूभी

टोयोटाको अर्बन क्रुजर एसयूभीको बिक्री शून्य भएपछि भारतमा कम्पनीले यसलाई आफ्नो वेबसाइटबाट हटाएको छ । स्रोतका अनुसार भारतमा यसको बिक्री शून्य भएपछि बन्द गर्नु परेको हो । यसअघि पनि मारुतीको एस–क्रसको बिक्री कम भएपछि बन्द गरिएको थियो ।

फेस्टिभ सिजनमा पनि अर्बन क्रुजरको एउटा पनि एसयूभी बिक्री हुन सकेन । अर्बन क्रुजर र भिटारा ब्रेजालाई एउटै प्लेटफर्ममा लन्च गरिएको हो । मारुतीले अहिले ब्रेजा मोडल मात्रै बजारमा बिक्री गरिरहेको छ ।

अर्बन क्रुजरको बिक्री बन्द गर्ने सम्बन्धमा टोयोटाको तर्फबाट कुनै वक्तव्य नआए पनि वेबसाइटबाट हटाइएको छ । कम्पनीले अस्थायी रुपमा बुकिङ बन्द गरेको पनि बताइएको छ ।

मिडिया रिपोर्टका अनुसार सेप्टेम्बरमा टोयोटा अर्बन क्रुजरको ३३० युनिट बिक्री गरेको थियो तर अक्टोबरमा यसको बिक्री शून्यमा झ¥यो । अर्बन क्रुजरको स्टक भएका टोयोटाका डिलरहरूले निरन्तर छुट अफर दिएर सो एसयूभीको कटौती गरिरहेका थिए ।

अर्बन क्रुजरमा ५० हजारदेखि ७० हजार भारुसम्म छुटको व्यवस्था पनि थियो । यसमा नगद र कर्पोरेट छुटका साथै एक्सचेन्ज बोनस र निःशुल्क सामान दिइँदै आएको थियो । अर्बन क्रुजरको एक्स शोरुम मूल्य ९ लाख भारुदेखि सुरु हुन्छ । यसमा जडान गरिएको के सिरिजको १.५ लिटर पेट्रोल इन्जिनले १०५ पीएस पावर र १३८ एनएम टर्क जेनेरेट गर्छ ।