शुक्रबार देखि होम डेलिभरी नहुने, खाद्यान्नका लागि यी नम्बरमा फोन गर्न सकिने

काठमाडौँ — काठमाडौं उपत्यकामा भोलि जेठ १४ अर्थात शुक्रबारदेखि लागू हुने निषेधाज्ञामा खाद्यान्नसहितका अत्यावश्यक वस्तुको होम डेलिभरी सेवा समेत पूर्ण रूपमा बन्द हुने भएको छ । यसअघिको निषेधाज्ञामा प्रशासनले बिहान १० बजेसम्म होम डेलिभरीलाई केही खुला गरेको थियो ।

यो पटकको निषेधाज्ञा थप कडाइ गर्ने निर्णय भएकाले होम डेलिभरी पूर्ण रूपमा बन्द गरिने काठमाडौंका प्रमुख जिल्ला अधिकारी कालीप्रसाद रिजालले बताएका छन् । यो निषेधाज्ञाको मिति सकिए पछि अर्थात जेठ २० गते पछि भने संक्रमणको स्थिति हेरी यसलाई केही खुुकुलो गर्न सकिने उनले बताएका छन् ।

काठमाडौं, ललितपुर र भक्तपुर गरी उपत्यकाका तीनै जिल्लाका प्रमुख जिल्ला अधिकारीको आदेश अनुसार भोलि देखि खाद्यान्न र किराना पसल समेत खोल्न पाइने छैन ।

गत वर्षको लकडाउनमा होम डेलिभरीलाई केही खुकुलो बनाइएको थियो । होम डेलिभरी गर्न पाउनु पर्ने माग राख्दै व्यवसायीले सर्वोच्च अदालतमा मुद्दा समेत दायर गरेका छन् । अदालतले खाद्य व्यवस्था तथा व्यापार कम्पनी लिमिटेडमार्फत होम डेलिभरी गर्ने विषयको कागजपत्र मगाएको छ ।

गत वर्ष होम डेलिभरीको मापदण्ड समेत तयार गरिएको थियो ।

खरिदका लागि वैकल्पिक व्यवस्था

तर खाद्य सामग्री खरिदका लागि भने वैकल्पिक व्यवस्था गरिएको छ ।

उपत्यका प्रशासनले नेपाल खाद्य व्यवस्था तथा व्यापार कम्पनी लिमिटेड र साल्ट ट्रेडिङ कर्पोरेसन लिमिटेडबाट अत्यावश्यक सामग्री मगाउन सक्ने गरी व्यवस्था गरेको हो । प्रशासनले त्यसका लागि कम्पनीको फोन नम्बर पनि सार्वजनिक गरेको छ । नागरिकले खाद्य सामग्री मगाए मोबाइल गाडीबाट घरमै लैजाने व्यवस्था मिलाइएको भनिएको छ ।