बागमती प्रदेश सरकारद्वारा विद्युतीय बस र सुरुङमार्ग निर्माण योजना स्थगित

काठमाडौं – पहिलेको सरकारले ल्याएको विद्युतीय बस खरिद गर्ने र कुलेखानी–हेटौंडा सुरुङमार्ग निर्माण गर्ने योजनालाई हालको बागमती प्रदेश सरकारले स्थगित गर्ने भएको छ ।

मुख्यमन्त्री राजेन्द्र पाण्डेले आफ्नो पार्टी एकीकृत समाजवादीको केन्द्रीय बैठकलाई दिएको जानकारीअनुसार विद्युतीय बस खरिद गर्ने योजना हाललाई स्थगित गरिएको छ । डोरमणि पौडेल नेतृत्वको सरकारले विद्युतीय बस खरिद गर्न भनेर ३० करोड रुपैयाँ रकम छुट्याएको थियो ।

यद्यपि सडक पूर्वाधार र चार्जिङ स्टेशनका लागि आवश्यक तयारी नभएकाले हाललाई विद्युतीय बस खरिदको योजना स्थगित गर्नुपरेको मुख्यमन्त्री पाण्डेले बताए ।

यस्तै कुलेखानी–हेटौंडा सुरुङमार्गलाई अघिल्लो सरकारले ५० करोड रुपैयाँ बजेट छुट्याएको थियो । तर यो आयोजनामा सरकारले १८ अर्ब रुपैयाँ लागत अनुमान गरेको भएपनि ३० अर्ब लाग्ने देखिएको र केन्द्र सरकारले रकम दिने सुनिश्चितता पनि नभएकाले यो योजना पनि हाललाई स्थगित गरेको पाण्डेले बताए ।

प्रदेशको तत्कालीन सरकारले २०८५ सालभित्र प्रदेशका मुख्य सहरमा इन्धनबाट चल्ने सवारी विस्थापित गर्ने नीति लिएको थियो। सोहीअनुसार विद्युतीय बस खरिदको विषयलाई प्राथमिकता दिइएको थियो।