ग्लोबल हेडक्वार्टर नै बिक्री गर्ने सोचमा निसान, वित्तिय संकट टार्न यस्ता उपाय अपनाउँदै

जापनिज अटो निर्माता निसान केही समययता आर्थिक संकटसंग जुधिरहेको छ । वित्तिय व्यवस्थापन गर्न नसकेर समस्याग्रस्त बन्दै गएको अटोमेकरले आफ्नो लागत कटौती गर्ने उपायहरु सार्बजनिक गरिरहेको छ ।

केहि समयअघि मात्र आफ्ना २० हजार कर्मचारी कटौती गर्ने र ७ वटा प्लान्ट बन्दा गर्ने घोषणा गरेको निसानले अव आफ्नो ग्लोबल हेडक्वार्टर नै बिक्री गर्ने सम्मको सोंच बनाएको छ ।

निसानले २००९ मा टोकियोबाट योकोहामामा आफ्नो हेडक्वार्टर सारेको थियो । १०० अर्व येनभन्दा बढी लगानीमा तयार पारिएको उक्त हेडक्वार्टर बिक्री गरेर आफ्नो संकट टार्न कम्पनीले छलफल अघि बढाएको हो ।

मिडिया रिपोर्टका अनुसार, उक्त हेडक्वार्टर मार्च २०२६ को अन्त्यसम्ममा निसानले बेच्न चाहेको सम्पत्तिहरूको सूचीमा देखापरेको हो । नयाँ सीईओ इभान एस्पिनोसाले सार्बजनिक गरेको निकट भविष्यमा बिक्री गरिने सम्पत्तिको विवरणमा हेडक्वार्टर सामेल नगरेपनि कम्पनीको संकटलाई टार्न सबै उपायहरु अवलम्वन गर्न सकिनेतर्फ इंगित भने गरेका छन् । आफ्नो मुख्यालय बिक्री गरेर यसलाई भाडामा चलाउने विषयमा समेत छलफल भइरहेको जनाइएको छ ।

कार निर्माताले लागत घटाउन केही नयाँ मोडलहरूको विकास पनि रोकिरहेको छ । यसअिघ सार्बजनि गरिएको १३ वटा नयाँ प्लटेफर्मबाट छ वटालाई हटाएर ७ वटा लाइनअपमा मात्र काम गर्ने उसको तयारी छ । साथै, स्पेयर पार्ट्सको जटिलतालाई ७० प्रतिशतले घटाएर थप उत्पादनहरूलाई एकताबद्ध गर्न निसानले ३ हजार अनुसन्धान तथा विकास कर्मचारीहरूलाई जिम्मेवारी दिएको छ ।

निसानले नयाँ मोडलहरूको लागि रेनोसँग सहकार्य गरिरहेको छ भने थप नयाँ उत्पादनहरूको लागि मित्सुबिशी सँगको साझेदारीलाई बलियो बनाउँदै लगेको छ । होन्डासँगको मर्जर प्रयास असफल भएपछि निसान अव आफ्नै बलमा बाँच्ने उपायहरू खोजिरहेको छ ।