१ युरोमा निसानले बेच्यो रुसमा रहेको आफ्नो कम्पनी

जापानी अटो कम्पनी निसानले रुसी बजार छाड्ने निर्णय गरेको छ । निसानले आफ्नो व्यवसाय रुसी सरकारी स्वामित्व रहेको एनएएमआईलाई मात्र १ युरोमा हस्तान्तरण गर्ने निर्णय गरेको छ । सो निर्णय पछि निसानलाई ६८७ मिलियन घाटा हुने भएको छ ।

यो कदम कम्पनीले रुसमा उत्पादन बन्द गर्न बाध्य भएको महिनौं पछि आएको हो । रूसले यस वर्ष फेब्रुअरीमा युक्रेनमा आक्रमण गरेपछि निसान रूसबाट बाहिरिने पछिल्लो कम्पनी बनेको छ । जापानी कार ब्रान्ड मित्सुबिशीले पनि रुसी बजारबाट बाहिरिने विचार गरिरहेको निक्केई एसियाले दाबी गरेको छ ।

निसानले सेन्ट पिटर्सबर्गमा रहेको आफ्नो निर्माण प्लान्ट हस्तान्तरण गर्नेछ । फ्रान्सेली अटोमेकरले यस वर्ष मे महिनामा रुसी कार निर्माता एभटोभाजको आफ्नो शेयर एक रूसी लगानीकर्तालाई बेचेको थियो । जसलाई रुस–युक्रेन युद्धको प्रभावका रूपमा पनि लिइएको थियो ।

रुस–युक्रेन युद्धको कारण निसानले यस वर्षको मार्चमा सेन्ट पिटर्सबर्ग प्लान्टमा उत्पादन रोकेको थियो । त्यस बेलादेखि नै निसानले रुसी बजारको अवस्थाको अनुगमन गरिरहेको बताइएको छ । जसले निसानलाई रूसी बजारबाट बाहिरिने निर्णय गर्न प्रेरित गरेको थियो ।