अटो शोमा निसानको नयाँ विशेषताका तीनवटा गाडी सार्वजनिक

काठमाडौं– भृकुटीमण्डपमा जारी नाडा अटो शो–२०२३ मा जापनिज ब्रान्ड निसानको तीनवटा नयाँ गाडीले दर्शकलाई आकर्षित गरिरहेको छ । मंगलबार अटो शोको उद्घाट्न कार्यक्रममा म्याग्नाइटको एएमटी भेरिएन्ट, इलेक्ट्रिक कार लिफको सेकेन्ड जेनेरेशन र नभरा प्रो फोर एक्सको लाइफ स्टायल एडिसनलाई आधिकारिक विक्रेता पायोनियर मोटोकर्पल सार्वजनिक गरेको थियो । यी तीनवटै गाडीले अहिले निसाको स्टलमा दर्शकलाई आकर्षित गरिरहेका हुन् ।

नयाँ गाडी सार्वजनिक गर्दै पायोनियर मोटो कर्पका प्रबन्ध निर्देशक सन्दीप कुमार शारडाले नेपाली ग्राहकहरूको रोजाई र प्राथमिकता अनुरूप आधुनिक मोबिलिटी सोलुसन प्रदान गर्ने प्रतिबद्धताका साथ आफूहरुले नाडा अटो सोमा निसानका नयाँ गाडीहरू प्रदर्शन गरेको वताए । ‘हामीले सार्वजनिक गरेका नयाँ गाडीहरूले विभिन्न फाइदाहरूका साथ ग्राहकको आवश्यकता तथा रोजाई पूरा गर्नुको साथै नयाँ ड्राइभिङ अनुभव प्रदान गर्ने विश्वास लिएका छौँ’ उनले भने ।

कार्यक्रममा निसान इन्डिया र साउथ एसिया व्यापार इकाईका निर्यात प्रमुख रघुनाथले नेपाल निसानका लागि प्रमुख बजार रहँदै आएको वताए । उनले भने, ‘हामी डाइनामिक पर्फमेन्सका साथै सुरक्षा र आरामलाई सुनिश्चित गर्न उत्कृष्ट श्रेणीका कारहरू ल्याउने क्रमलाई भोलिमा दिनमा पनि जारी राख्दै जानेछौ ।’

निसानले छिट्टै नयाँ एक्स–ट्रेल इ–पावर सार्वजनिक गर्न लागेको र यसले सहरको ट्राफिकमा पनि आरामदायी ड्राइभिङ अनुभव प्रदान गर्ने उनले वताए । ‘निसान एक्स–ट्रेलको यो हाइब्रिड इ–पावर संस्करणले उत्कृष्ट कार्यकुशलता, आधुनिक सुविधा र आरामदायी इलेक्ट्रिक ड्राइभिङ अनुभव प्रदान गर्नेछ’ उनले थपे ।