निसान म्याग्नाइट बन्यो आईसीसी टी२० वर्ल्ड कप २०२२ को अफिसियल कार

निसान मोटर इन्डियाले लगातार सातौं पटक अन्तर्राष्ट्रिय क्रिकेट परिषद्सँग गठबन्धनको घोषणा गरेको छ । सो कार अक्टोबर १६ देखि नोभेम्बर १३ सम्म अस्ट्रेलियामा हुने आईसीसी टी२० विश्वकप २०२२ को आधिकारिक प्रायोजक हुनेछ । साथै निसान म्याग्नाइट एसयूभीलाई यस कार्यक्रमको अफिसियल कारको रूपमा समावेश गरिनेछ ।

निसान इन्डियाले यस अवधिमा आईसीसी टी२० विश्वकप २०२२ भर्चुअल ट्रफि टुरको प्रचार गर्नेछ, जसले प्रशंसकलाई कार्यक्रमको आधिकारिक फेसबुक र इन्स्टाग्राम पेजमा थ्रीडी अगमेन्टेड रियालिटी फिल्टर मार्फत भर्चुअल्ली एक्सेस गर्न सुविधा हुनेछ ।

डिसेम्बर २०२० मा लन्च गरिएको निसान म्याग्नाइट एसयूभीको प्रारम्भिक मूल्य ५ लाख ९७ हजार भारु छ । निसान म्याग्नाइटले ग्राहकहरुबाट हालसम्म १ लाख भन्दा बढी बुकिङ प्राप्त गरिसकेको छ । जुलाई २०२२ मा, निसानले “निसान म्याग्नाइट रेड एडिसन“ ७ लाख ८६ हजार भारु मूल्यमा भारतमा लन्च गरेको थियो ।

नेपाली बजारमा पनि निसान म्याग्नाइट लोकप्रिय कार मानिन्छ । नेपालमा पायोनियर मोटोकर्पले निसान म्याग्नाइट बिक्री–वितरण गरिरहेको छ ।

निसान म्याग्नाइट विश्वका १५ भन्दा बढी देशहरूमा लन्च गरिएको छ । पछिल्लो समय नेपालका साथै भुटान र बंगलादेशमा पनि लन्च गरिएको थियो । सन् २०१० देखि हालसम्म निसानले १०८ देशहरूमा सवारी साधन निर्यात गरिसकेको छ ।