म्याग्नाइट फेसलिफ्टको निर्यात अन्तराष्ट्रिय बजारमा सुरु, कहिले आउला नेपाल ?

निसानले गत अक्टोबर ४ मा लन्च गरेको म्याग्नाइट फेसलिफ्टलाई अन्तराष्ट्रिय बजारमा पठाउन सुरु गरेको छ । पहिलो लटमा २ हजार ७०० यूनिट म्याग्नाइट दक्षिण अफ्रिकामा निर्यात गरिएको कम्पनीले जनाएको हो ।

डिजाइनमा सामन्य अपडेट गरेर ल्याइएको यसको फेसलिफ्ट मोडेलमा ग्रिल र क्रोम वरिपरि पुनः डिजाइन गरिएको फ्रन्ट बम्पर र एलईडी टेल लाइट समावेश गरिएको छ । यसका साथै यसमा १६ इन्चको ड्युअल टोन अलोय ह्विल नयाँ डिजाइनको छ भने फ्रन्ट फग ल्याम्प पनि नयाँ डिजाइनको छ ।

एसयूभीको इन्टेरियरमा धेरै परिवर्तन गरिएको छ । यसको फेसलिफ्ट मोडेलमा निसानले ड्यासबोर्ड, डोर प्याड र सेन्टर कन्सोल वरपर नयाँ ब्लाक र ओरेन्ज रङको थिम दिएको छ । साथै, ड्यासबोर्ड लेआउट, एसी भेन्ट्सको डिजाइन र स्टेयरिङ ह्विल प्रि–फेसलिफ्ट मोडलभन्दा एकदमै भिन्न छ ।

कारमा ८ इन्चको टचस्क्रिन, ७ इन्चको डिजिटल ड्राइभर डिस्प्ले, ४ रङको एम्बियन्ट लाइटिङ र वायरलेस फोन चार्जर जस्ता फिचर समावेश छ । सेफ्टीका लागि यसमा ६ वटा एयरब्याग, टायर प्रेसर मोनिटरिङ सिस्टम, अटो डिमिङ आईआरभीएम र ३६० डिग्री क्यामेरालगायत अन्य फिचर उपलब्ध गराइएको छ ।

म्याग्नाइट फेसलिफ्टमा १.० लिटर पेट्रोल र १.० लिटर टर्बो पेट्रोल इन्जिन विकल्प छ । भारतमा यसको मूल्य ५ लाख ९९ हजारदेखि ११ लाख ५० हजार भारुसम्म निर्धारण गरिएको छ ।

केही समयअघि सम्म निसान म्याग्नाईट नेपाली बजारमा निकै नै रुचाइएको मोडेल थियो । तर अहिले ईभीको लोकप्रियताका कारण म्याग्नाइट लगायत प्राय सबैजसो कम्वसन गाडीले बजार लिन संघर्ष गर्नु परेको छ । यस्तो अवस्थामा म्याग्नाइट फेसलिफ्ट तत्कालै नेपाल आउने संभावना कम देखिन्छ ।