निसान म्याग्नाइट र लिफ भयो थप मंहगो, म्याग्नाइटमा १ लाखसम्म बढ्दा लिफमा बढ्यो ३ लाख रुपैयाँ

निसानको लोकप्रिय एसयूभी म्याग्नाइट र इलेक्ट्रिक कार लिफ थप महंगो भएको छ । नेपालका लागि आधिकारिक बितरक पायोनियर मोटोकर्पले म्याग्नाइटमा ८५ हजारदेखि १ लाख रुपैयाँसम्म र लिफमा ३ लाख रुपैयाँले मूल्य बढाएपछि यी गाडी महंगो भएको हो ।

नन् टर्वोमा कुल ६ वटा मोडल उपलब्ध रहेको म्याग्नाइटको २ वटा भेरिएन्ट एक्सभी अप्पर डुअल र एक्सभी प्रिमियम डुअलमा ८५ हजार रुपैयाँका दरले बढाइएको छ । यसअघि ३७ लाख ४९ हजार र ४० लाख ९९ हजार रुपैँयामा बिक्री हुँदै आएको यी एसयुभीको नयाँ मूल्य क्रमश ३८ लाख ३४ हजार र ४१ लाख ८५ हजार रुपैयाँ पुगेको छ ।

अन्य ४ भेरिएन्टहरु एक्सई वेस, एक्सएल मिड, एक्सभी अप्पर मोनो र एक्सभी प्रिमियम मोनोमा भने १ लाख रुपैयाँका दरले मूल्य बढाइएको छ । यसअघि ३० लाख ९९ हजार, ३४ लाख ९९ हजार, ३७ लाख ९९ हजार र ४० लाख ४९ हजार रुपैयाँमा बिक्री गरिँदै आएको यी भेरिएन्टको नयाँ मूल्य क्रमश ३१ लाख ९९ हजार, ३५ लाख ९९ हजार, ३८ लाख ९९ हजार र ४१ लाख ४९ हजार रुपैयाँ कायम गरिएको छ ।

यसैगरी टर्वो इन्जिनमा पनि २ वटा भेरिएन्टमा ८५ हजार र बाँकी ३ भेरिएन्टमा १ लाख रुपैयाँका दरले मूल्य बढाइएको छ । यसअघि ४२ लाख ४९ हजार रुपैयाँमा बिक्री गरिँदै आएको एक्सभी अप्पर डुअलको मूल्य ४३ लाख ३४ हजार र ४५ लाख ४९ हजार रुपैयाँ पर्ने एक्सभी प्रिमियम डुअलको मूल्य बढाएर ४६ लाख ३४ हजार पुर्याइएको छ । वाँकी तीन भेरिएन्टको नयाँ मूल्य भने एक्सएल मिडको ३९ लाख ९९ हजार, एक्सभी अप्पर मोनोको ४२ लाख ९९ हजार र एक्सभी प्रिमियम मोनोको ४५ लाख ९९ हजार रुपैया पुगेको छ । यी भेरिएन्टमा १ लाख रुपैयाँका दरले मूल्य बढेको हो ।

गत सेप्टेम्वर महिनामा नेपाल भित्रिएको इलेक्ट्रिक कार लिफमा भने एकैपटक ३ लाख रुपैयाँ बृद्धि गरिएको छ । यससँगै यसअघि ५९ लाख ९९ हजार रुपैयाँमा बिक्री हुँदै आएको यो कारको नयाँ मूल्य ६२ लाख ९९ हजार रुपैयाँ पुगेको छ ।