चिनियाँ प्रविधिबाट सिक्दै निसान, अब २६ महिनामै बजारमा आउनेछन् नयाँ गाडी

निसान मोटर कम्पनीले जुन १२ मा एक ठूलो रणनीतिक परिवर्तनको घोषणा गर्दै आफ्नो सवारी साधन विकास चक्रलाई सफलतापूर्वक आधा घटाएको खुलासा गरेको छ । जापनिज अटोनिर्माता कम्पनी निसानले आफ्नो परम्परागत ५५ महिनाको विकास अवधिलाई मात्र २६ महिनामा झारेको हो । नवप्रवर्तनलाई तीव्र पार्ने उद्देश्यले गरिएको यो रणनीतिक परिवर्तन चिनियाँ अटोमेकरहरूले सुरु गरेको एआई–संचालित द्रुत मोडेलहरूबाट धेरै प्रेरित छ ।

निसानका अध्यक्ष इभान एस्पिनोसाले नयाँ तीव्र कार्यप्रवाहको पुष्टि गर्दै अर्को पुस्ताको ’स्काईलाइन’ मोडलको निर्माणका क्रममा यसको परीक्षण भइसकेको जानकारी दिएका छन् । यो गाडी २०२६ को जाडो याममा बजारमा आउने तालिका छ । कम्पनीले आगामी आर्थिक वर्ष २०२६ भित्र आफ्ना ९० प्रतिशत सवारी साधन परियोजनाहरूमा यो नयाँ र सुव्यवस्थित प्रक्रिया लागू गर्ने योजना बनाएको छ ।

निसानको यो रूपान्तरण चीनमा डोङफेङ मोटरसँगको संयुक्त उद्यममार्फत प्राप्त अनुभव र पाठहरूमा आधारित छ । चिनियाँ बजारको स्थानीय विशेषज्ञता र प्रविधिहरूलाई एकीकृत गर्दै निसानले यसअघि अप्रिल २०२५ मा सार्वजनिक गरिएको आफ्नो पूर्ण–इलेक्ट्रिक एन७ मोडलमा यो रणनीतिको सफल परीक्षण गरेको थियो, जसको विकास चक्र मात्र दुई वर्षमा पूरा भएको थियो ।

बजारमा नयाँ गाडीहरू छिटो उपलब्ध गराउन निसानले सवारी साधन विकासको सम्पूर्ण चक्रमा कृत्रिम बुद्धिमत्तालाई चार मुख्य क्षेत्रमा एकीकृत गरिरहेको छ । जसमा डिजाइन, परीक्षण, निर्माण प्रक्रिया र आपूर्ती श्रृंखला समावेश छन् ।

निसानले विकासको गति बढाउन चालेको यो आक्रामक कदम कम्पनीको लागि निकै महत्वपूर्ण समयमा आएको हो । यस विकास घोषणासँगै सार्वजनिक भएको पछिल्लो बजार तथ्याङ्क अनुसार निसानले मे २०२६ मा चीनमा ३० हजार २५ युनिट सवारी साधन मात्र बिक्री गरेको छ, जुन अघिल्लो वर्षको सोही अवधिको तुलनामा ४१.१ प्रतिशतको भारी गिरावट हो ।

चीनका स्थानीय प्रतिस्पर्धी कम्पनीहरूको द्रुत विकास चक्रलाई अपनाएर निसानले घट्दो बजार हिस्सालाई पुनः प्राप्त गर्ने र उपभोक्ताहरूको बदलिँदो मागलाई अभूतपूर्व गतिमा सम्बोधन गर्ने लक्ष्य राखेको छ ।