एलएस अटोको दुई नयाँ ईभी नेपाल आउँदै, नाइमा मोबिलिटी एक्स्पोमा सार्वजनिक हुने

काठमाडौं– एलएस अटोको दुई नयाँ ईभी नेपाल आउने भएका छन् । एलएस अटोको नेपालका लागि आधिकारिक वितरक नेक्सन भेन्चर प्रालिले आगामी नाइमा नेपाल मोबिलिटी एक्स्पोमा एलईभी ०५ र एलईभी एक्स गरी दुई नयाँ मोडल ल्याउने भएको हो ।

कम्पनीले नाइमा मोबिलिटी एक्स्पोसंगै नाडा अटो शो २०२५ मा पनि यी ईभी प्रदर्शन गर्ने योजना बनाएको छ । नाईमा अटोशो आगामी साउन २१ देखी २५ गतेसम्म हुँदै छ भने नाडा अटो शो भदौ ३ देखी गतेसम्म काठमाडौंको भृकुटीमण्डमा हुने तय भएको छ ।

कम्पनीले नेपाल ल्याउन लागेको विद्युतीय कार एलईभी ०५ मा ५६ किलोवाट आवरको एलएफपी ब्याट्री प्याक र ५० किलोवाट क्षमताको फ्रन्ट ह्विल ड्राइभ मोटर जडान गरिएको छ । यो कारले एक पटकको फुल चार्जमा ४ सय किलोमिटरभन्दा बढी रेन्ज दिने दाबी कम्पनीले गरेको छ । कारलाई ६० किलोवाटको डीसी फास्ट चार्जर र ७ किलोवाटको एसी चार्जरले चार्ज गर्न सकिने बताइएको छ ।

ह्याचब्याक सेग्मेन्टमा पर्ने यस कारको लम्बाई ४२ सय एमएम, चौडाई १७ सय ७० एमएम र उचाई १६ सय १० एमएम छ । यो कारमा २६ सय ५० एमएम लामो ह्वीलबेस रहेको छ । १७ इन्चको अलोय ह्वील रहेको एलईभी ०५ मा १ सय ७५ एमएम ग्राउण्ड क्लियरेन्स रहेको कम्पनीले जनाएको छ ।

यसैगरी, नेक्सन भेन्चरले सार्वजनिक गर्न लागेको अर्को मोडल एलईभी एक्स भने अघि नै नेपाली बजारमा बिक्री भइरहेको एलईभी ०१ को फोर ह्वील ड्राइभ भर्सन हो । क्रसओभर एसयुभी सेग्मेन्टमा पर्ने यस ईभीमा ७७ किलोवाट आवरको ब्याट्री प्याक र २ सय किलोवाटको मोटर रहने जनाइएको छ । साथै, यसमा केही फिचर अपग्रेड समेत हुने कम्पनीको भनाई छ ।

एलएस अटोको उत्पादन बिक्री गर्न कम्पनीले तीनकुने एयरपोर्ट कार्गो टर्मिनल अगाडी नयाँ शोरुम तयार पारेको छ ।