५ भेरिएन्टमा आयो नयाँ सुजुकी स्विफ्ट, यस्तो छ मूल्य र फिचर

मारुती सुजुकीको नयाँ स्विफ्ट भारतमा लन्च भएको छ । चौथो जेनेरेशन स्विफ्टलाई सुजुकीले ५ भेरिएन्टमा ल्याएको हो । जसको सुरवाती मूल्य ६ लाख ४९ हजार भारु निर्धारण गरिएको छ । जुन पुरानो स्विफ्टभन्दा २५ हजार भारु बढी हो । टप स्पेक भेरिएन्टको मूल्य भने ९ लाख ५० हजार भारु तोकिएको छ ।

चौथो पुस्ताको स्विफ्टलाई सुजुकीले २०२३ को जापान मोबिलिटी शोमा विश्वव्यापी रूपमा डेब्यू गरेको थियो । भारत–विशेष कार अलि फरक रहेको छ । यसमा अगाडि र पछाडि फरक फरक बम्पर, ब्ल्याक आउट सी–पिलर, एलईडी हेडलाइट, एलईडी फग ल्याम्प र बुट लिडमा माउन्ट गरिएको रिभर्स क्यामेरा दिइएको छ ।

नयाँ स्विफ्टमा नयाँ जेड सिरिज १.२–लिटर ३–सिलिन्डर माइल्ड–हाइब्रिड पेट्रोल इन्जिन जडान गरिएको छ । जसको पावर ८२ एचपी र टर्क ११२ एनएम छ । कारले एक लिटर पेट्रोलको खपतमा २५.७५ किलोमिटर माइलेज दिने दावी छ । नयाँ कार ५ स्पिड म्यानुअल र ५ स्पिड एएमटी अप्सनमा उपलब्ध हुनेछ ।

पुरानो मोडलको तुलनामा निकै नै प्रिमियम बनेर आएको यसको टप स्पेक भेरिएन्टमा ९ इन्चको फ्लोटिङ टचस्क्रिन, अर्कामिज साउन्ड सिस्टम, वायरलेस फोन चार्जर, रियर एसी भेन्ट, एलइडी फग ल्याम्प, क्रुज कन्ट्रोल, अटोमेटिक क्लाइमेट कन्ट्रोल, रियर क्यामेरा र वायरलेस एन्ड्रोइट अटो एण्ड एप्पल कार प्ले लगायत प्रिमियम फिचर राखिएको छ ।

सुरक्षका लागी कारमा ६ वटा एयरब्याग, एबीएस सहित ईबीडी र ईएसपी, रियर पार्किङ सेन्सर र हिल स्टार्ट एसिस्ट लगायत फिचर दिइ एको छ । कारमा अपेक्षा गरिएअनुसार ३६० डिग्री क्यामेरा र एडिएएस लगायत फिचर भने उपलब्ध गराइएको छैन ।