इन्ट्री लेभलमा नयाँ खेलाडी बन्ने सम्भावना : २६ किमी माइलेज दिने नयाँ सेलेरियो आज लन्च हुँदै

भारतमा आज मारुती सुजुकीको नयाँ पुस्ताको सेलेरियो ह्याचब्याक कार सार्वजनिक हुने भएको छ । केही दिन पहिले यसको टिजर तस्बिर सार्वजनिक भएको थियो र बुकिङ पनि प्रारम्भ गरिएको थियो ।

नयाँ सेलेरियो पहिलेभन्दा धेरै पावरफुल हुनेछ । यसमा १.० लिटर के१०सी के सिरिज डुअलजेट, डुअल भीभीटी पेट्रोल इन्जिन र ५ स्पिड म्यानुअल र अटोमेटिक गियरबक्समा उपलब्ध हुनेछ । कारको इन्जिनको पावर, टर्क र फिचरको बारेमा जानकारी लन्चिङसँगै सार्वजनिक गरिने छ ।

रिपोर्टका अनुसार नयाँ सेलेरियो २६ किलोमिटर प्रति लिटरको माइलेज प्रदान गर्ने क्षमता रहेको छ । माइलेज बढाउन आइडल स्टार्ट–स्टप फिचर दिइएको छ ।

नयाँ २०२१ मारुती सेलेरियो ४ वटा ट्रिम एलएक्सआई, भीएक्सआई, जेडएक्सआई र जेडएक्सआई प्लस र ७ भेरिएन्टमा उपलब्ध हुनेछ । सो कार ६ रङ सिल्की सिल्भर, सोलिड फायर रेड, आर्कटिक ह्वाइट, क्याफिन ब्राउन, ग्लिस्टेनिङ ग्रे र स्पीडी ब्लू समावेश छ । नयाँ सेलेरियो हार्टेक्ट प्लेटफर्ममा आधारित छ ।

नयाँ सेलेरियोमा अपडेट गरिएको एक्सटेरियर लुकको साथ आउने अपेक्षा गरिएको छ । कारमा अपडेट हेडल्याम्प, बम्पर र टेलल्याम्प उपलब्ध हुनेछ । इन्ट्री लेभल ह्याचब्याकलाई आकर्षक बनाउनको लागि कारको फुल बडी किटमा केही परिमार्जन गरिएको छ ।

नयाँ मारुती सेलेरियोमा एप्पल कारप्ले र एन्ड्रोइड अटोलाई सपोर्ट गर्ने टचस्क्रिन इन्फोटेनमेन्ट स्क्रिन जस्ता फिचर समावेश गरिएको छ । साथै आइडल स्टार्ट÷स्टप फङसनको साथ पुश स्टार्ट÷स्टप बटन पनि समावेश गरिएको छ । कारमा सेमी–डिजिटल इन्स्ट्रयुमेन्ट क्लस्टर र मल्टि–स्पोक स्टेयरिङ ह्वील पनि हुने सम्भावना रहेको छ ।

सो कारको मूल्य ४ लाख ५० हजार भारु भन्दा बढी हुनसक्छ । पुरानो मोडलको एक्स–शोरूम मूल्य ४ लाख ६६ हजार भारु रहेको छ र टप–स्पेक ट्रिमको एक्स–शोरूम मूल्य ६ लाख भारु रहेको छ । लन्चिङ पछि सो कार इन्ट्री–लेभल ह्याचब्याक सेगमेन्टमा रेनो क्विड, हुन्डाई स्यान्ट्रो र टाटा टियागो जस्ता कारसँग प्रतिस्पर्धा गर्नेछ ।