सितापाइलामा खुल्यो स्कोडाको अत्याधुनिक र सुबिधासम्पन्न सर्भिस सेन्टर

स्कोडा गाडीको नेपालका लागी आधिकारिक बितरक एमएडब्लु इन्टरप्राइजेजले सितापाइलामा नयाँ सर्भिस सेन्टर संचालनमा ल्याएको छ । आज एक कार्यक्रमको आयोजना गरी उक्त सर्भिस सेन्टको औपचारिक उद्घाटन गरिएको हो ।

१५ हजार स्क्वायर फिट क्षेत्रफलमा फैलिएको यो सर्भिस सेन्टरमा अत्याधुनिक उपकरण जडान गरिएको छ । सर्भिस सेन्टरमा काम गर्ने टेक्निसियन दक्ष तथा अनुभबी रहेको कम्पनीेले बताएको छ । वर्कशपमा १२ वटा अत्याधुनिक वे, ह्विल अलाइन्मेन्ट तथा व्यालेन्सर, पेन्टवुथ र डाइग्नोसिस उपकरण राखिएको छ । यी मध्ये अधिकांश उपकरण एटिएस एल्गी ब्रान्डका हुन् । युरोपियन ब्रान्डको स्कोडा गाडी प्रयोग गर्ने ग्राहकलाई प्रिमियम स्तरको सर्भिसिङ उपलब्ध गराउन कुनै कन्जुस्याई नगरिएको कम्पनीको भनाई छ ।

तत्कालका लागी दैनिक २० भन्दा बढी गाडीलाई सेवा दिन सक्ने गरी सर्भिसि सेन्टरको पूर्बाधार निर्माण गरिएको र आवश्यकता अनुसार ४० वटा सम्म गाडीको सर्भिसिङ गर्ने गरी पूर्बाधार बिस्तार गर्न सकिने कम्पनीका निर्देशक रौनक अग्रवालले बताए । उनले भने, ‘प्रिमियम ब्रान्डका रुपमा परिचित स्कोडा गाडी प्रयोग गर्ने ग्राहकलाई छिटो छरितो र प्रभावकारी सेवा उपलब्ध गराउन हामीले सर्भिस सेन्टरलाई समेत प्रिमियम स्तरको बनाएका छौ । यो सर्भिस सेन्टर संचालनमा आएसंगै ग्राहकले अझै परिस्कृत सेवा पाउनेछन् ।’ सर्भिस सेन्टरसंगै कम्पनीले स्पेयर पार्टस्को समेत पर्याप्त स्टक राखेको छ ।

गाडीमा के–कस्ता समस्या छन् भनेर चेक गर्न सर्भिस सेन्टरभित्रै टेष्ट ट्र्याक समेत निर्माण गरिएको छ । विशेष प्रकारले निर्माण गरिएको सो ट्र्याकमा गाडी चलाउँदा गाडीभित्र के–कस्ता समस्या छन् भनेर सहजै पत्ता लगाउन सकिने र सोही अनुरुप मर्मतसम्भार गर्न सहज हुने बताइएको छ ।