ड्राइभिङ लाइसेन्स सम्बन्धी कार्यविधि निर्देशिका जारी, यस्ता छन् विभिन्न नयाँ व्यवस्था

काठमाडौं – सवारी चालक अनुमतिपत्र (ड्राइभिङ लाइसेन्स) का लागि स्वास्थ्य परीक्षण गर्न अब यातायात व्यवस्था कार्यालय नगएर बाहिरकै सूचीकृत चिकित्सकसँग समेत गर्न सकिने भएको छ । यातायात व्यवस्था विभागले विद्युतीय माध्यमबाट सवारी चालक अनुमतिपत्रको सेवा प्रवाह गर्ने सम्बन्धी कार्यविधि निर्देशिका, २०८० जारी गर्दै यस्तो व्यवस्था गरेको हो ।

सवारी चालक अनुमति पत्रका लागि सञ्चालनमा रहेको अनलाइन ड्राइभिङ लाइसेन्स आवेदन दर्ता प्रणालीलाई थप परिमार्जन एवं स्तरोन्नति गरी अन्य विभिन्न कार्य समेत सहजताका लागि यो कार्यविधि निर्देशिका जारी गरिएको छ ।

यस अनुसार विभिन्न प्रक्रियाको वारेमा यसमा स्पष्ट गरिएको छ । नयाँ लाइसेन्स लिदा वा नवीकरण गर्दा र अन्य विभिन्न विवरण थप गर्दा मेडिकल चेकजाँचको ‘म सम्बन्धित यातायात व्यवस्था कार्यालयमा गई स्वास्थ्य परीक्षण गर्न चाहन्छु’ भन्ने र ‘म कार्यालय बाहिरका सूचीकृत चिकित्सकसँग स्वास्थ्य परीक्षण गर्न चाहन्छु’ भन्ने विकल्प देखा पर्छ । त्यसमध्ये एउटा विकल्प छनौट गर्नुपर्छ ।

प्रदेशले कार्यालय बाहिर रहेर सेवा दिने चिकित्सक सूचीकृत नगरेसम्मका लागि कार्यालयमा नै गई मेडिकल जाँच गर्ने विकल्प मात्र उपलब्ध हुनेछ । तर पछि सूचीकृत गरे पश्चात यो सुविधा उपलब्ध हुनेछ ।

निर्देशिका सम्बन्धी विस्तृत जानकारी यो लिंकबाट लिन सकिन्छ ।